Hadisə

Ana səhifə

Hadisə

Azərbaycanın Qax rayonunda kütləvi insan qalıqlarının aşkarlanması ilə əlaqədar ərazidə aparılan işlər dayandırılıb - FOTOSESSİYA

Azərbaycanın Qax rayonunda kütləvi insan qalıqlarının aşkarlanması ilə əlaqədar ərazidə aparılan işlər dayandırılıb - <font color=#FF0000>FOTOSESSİYA</font>

01 may 2008 13:46 (UTC +04:00)

Tofiq Müseyibova məxsus mənzil üçün kanalizasiya quyusu qazan fəhlələr torpağın dərinliyində çoxlu sayda insan kəlləsinə, sümüklərə rast gəliblər. Ərazidə çalışan fəhlələrin dediyinə görə, insan qalıqlarının tapılması onları qazıntı işini təxirə salmağa vadar edib. Fəhlələr dərhal bu barədə Qax Rayon İcra Hakimiyyətinə və lazımi təşkilatlara məlumat veriliblər. Yerli sakinlərin dediyinə görə, qazıntı işlərinin aparıldığı yer tarixi abidə kimi qorunan Alban kilsəsinin ərazisidir. Buna baxmayaraq, rayon rəhbərliyi yerli bələdiyyə ilə birgə həmin əraziləri sakinlərə paylayıb. Abidənin ərazisində evləri və torpaq sahələri olan sakinlər isə torpaqların qanuniliyini sübut edən əsaslı sənədlərə malik olduqlarını iddia edirlər.
Qeyd edək ki, sözügedən tarixi abidənin ərazisi yerli sakinlərə paylanılıb. Artıq həmin ərazidə bir neçə torpaq sahibi yaşayış evi tikib. Lakin Azərbaycan qanunvericiliyinə əsasən, ölkə ərazisində olan tarixi abidələrin yaxınlığındakı torpaq sahələrinin sakinlərə paylanılması, orada yaşayış evlərinin tikilməsi və qazıntı işlərinin aparılması qadağandır.
Azərbaycan Milli Elmlər Akademiyasının Arxeologiya və Etnoqrafiya İnstitutunun sektor müdiri Vilayət Kərimov dünən hadisə yerində olub, tapıntılara baxıb. V. Kərimov ərazidə çalışan fəhlələrə qazıntıları dayandırmağı tapşırıb, araşdırma aparıldığını bildirib. O, APA-nın yerli bürosuna isə həmin ərazidə qədim məzarlığın olduğunu deyib. Əlavə məlumat vermək istəmədiyini qeyd edən sektor müdiri ətraflı açıqlamanın bir müddət sonra veriləcəyini söyləyib.
Hazırda hadisə yerində heç bir tədqiqat aparılmır. Hətta əraziyə girişin qadağan olunmasını göstərən adi lövhə belə vurulmayıb. İstənilən şəxs qalıqların tapıldığı yerə maneəsiz keçə bilir. Bu laqeydlik isə vacib tarixi əhəmiyyətli tapıntıların məhv olması ilə nəticələnə bilər.