Maliyyə

Ana səhifə

Maliyyə

«AzeriCard» 15 illiyini qeyd edir

02 noyabr 2012 12:32 (UTC +04:00)

Bakı. Vahab Rzayev - APA-Economics. Azərbaycanın «AzeriCard» Prosessinq Mərkəzi 15 il əvvəl, 1997-ci ilin oktyabrında Azərbaycan Beynəlxalq Bankı (ABB) tərəfindən emissiya edilən ilk bank plastik kartını buraxıb. Bankın mətbuat xidmətindən «APA-Economics»ə verilən məlumata görə, təsisçisi ABB olan «AzeriCard» Prosessinq Mərkəzi 1996-cı ildə yaradılıb və bir ildən sonra «EUROPAY International (MasterCard)»ın Təhlükəsizlik Departamentinin miqyaslı sertifikatlaşmasını keçib.

Hazırda «AzeriCard» kart və ödəmələrlə əməliyyatlar üzrə xidmətlərin göstərilməsi üçün ən yeni sistem quraşdırıb. Sistem bütün daxili və beynəlxalq əməliyyatların aparılmasına imkan verir. Bu sistem «MasterCard», «Visa», «American Express» və «Diners Club» ödəmə sistemləri ilə işləyir və əməliyyatları «AzeriCard»a qoşulan bütün banklar apara bilir.

Bankda vurğulayıblar ki, «Cash by Code», «Cash In», «Cash to any Card», «Visa Personal Payments», «PIN Set», «PIN Activation» və «GPRS ATM modem» kimi yeni texnologiya və layihələr sonuncu deyil və «AzeriCard» sonrakı 15 il ərzində də ölkənin ən böyük prosessinq mərkəzi qalmaq niyyətindədir.

Hazırda «AzeriCard» Azərbaycanın daxilində və xaricdə olan 30 bankı prosessinq edir və bunlardan 28-i beynəlxalq ödəmə sistemlərinin üzvüdür. Mərkəzdə 2 mln. kart, 1 600 bankomat və 30 min POS-terminal xidmət olunur.