Maliyyə

Ana səhifə

Maliyyə

Vergi Apellyasiya Şurası daha iki vergi ödəyicisinin xeyrinə qərar çıxarıb

14 may 2011 08:45 (UTC +04:00)

Bakı. Əli Əhmədov - APA-Economics. Vergilər Nazirliyinin Vergi Apellyasiya Şurasının növbəti iclasında daha üç vergi ödəyicisinin şikayətinə baxılıb.

Nazirlikdən «APA-Economics»ə verilən məlumata görə, işlərin biri “SV Alqı-Satqı” MMC-nin kameral vergi yoxlamalarının nəticələrinin ləğv edilməsi barədə olub.

Apellyasiya Şurasında aparılan araşdırma göstərib ki, şirkətin ƏDV məbləği 410 082,29 manat göstərilməli olduğu halda, 405 055,83 manat göstərilib, bu səbəbdən 2009-cu il üzrə gəlir məbləği 2 278 234,94 manatadək artırılaraq 501 211,69 manat əlavə mənfəət vergisi hesablanıb, ümumilikdə 911 293,98 manat əlavə hesablama aparılıb.

İş üzrə materiallar araşdırılarkən ƏDV üzrə dövriyyənin səhvən 5 026,46 manat əvəzinə 410 082,29 manat göstərildiyi müəyyən olunub. Araşdırmanın nəticəsi olaraq Vergi Apellyasiya Şurası “SV Alqı-Satqı” MMC-də aparılmış yoxlamaların nəticələrinin ləğv olunması və orada növbədənkənar səyyar vergi yoxlamasının təyin olunması barədə qərar çıxarıb. Yoxlamanın nəticələri Vergi Apellyasiya Şurasında yenidən müzakirə olunacaq.

2 saylı Ərazi Vergilər İdarəsində qeydiyyatda olan Famil Mirzəyevin səyyar vergi yoxlamasının nəticələrinin ləğv olunması barədə şikayəti araşdırılanda isə müəyyən edilib ki, ödəyicidə səyyar vergi yoxlaması nəticəsində 61 948,2 manat vergi hesablanıb, 21 769,35 manat maliyyə sanksiyası tətbiq edilib.

Araşdırma zamanı məlum olub ki, sahibkar tərəfindən “Lotto Yayım” şirkəti ilə agent müqaviləsi əsasında göstərilmiş xidmətə görə əldə edilən gəlirlər bəyan edilib, vergilər vaxtında hesablanaraq dövlət büdcəsinə ödənilib, səyyar vergi yoxlaması aktı tərtib edilərkən əlavə hesablanmış vergi məbləği isə düzgün olmayaraq fiziki şəxsin bütün dövriyyəsindən hesablanıb.

Qeyd olunanları nəzərə alaraq Apellyasiya Şurası 2 saylı ƏVİ-nin “Vergi ödəyicisinin vergi qanunvericiliyinin pozulmasına görə məsuliyyətə cəlb edilməsi haqqında” qərarını ləğv edib. Eyni zamanda vəzifələrini keyfiyyətlə, vergi qanunvericiliyinə və verilmiş təlimatlara uyğun şəkildə yerinə yetirməmiş, nöqsanlara yol vermiş vergi orqanının müvafiq vəzifəli şəxsinin (şəxslərinin) intizam məsuliyyətinə cəlb edilməsi məsələsinə baxılması haqqında qərar qəbul edib.

Apellyasiya Şurasının iclasında baxılan 3-cü məsələ vergi ödəyicisi kimi 10 saylı Ərazi Vergilər İdarəsində qeydiyyatda olan “Qəbələ-Şərab” ASC-nin hesablanmış vergi və faizlərin silinməsi barədə təkrar müraciətinə aid olub.

Məlum olub ki, vaxtilə ASC-nin iddia ərizəsi əsasında bu işə Ali Məhkəmə tərəfindən də baxılıb və Ali Məhkəmənin qərarı ilə 1 111,98 manat məbləğində borcun vergi ödəyicisinin siyahıya alınmış əmlakının ixtisaslaşdırılmış açıq hərracda satılması hissəsi rədd edilib, amma 7 688,02 manat və ona hesablanmalı olan 98,66 manat faiz borcu hissəsi təmin edilib. ASC vergi borclarının silinməsi və bank hesablarına qoyulan sərəncamların götürülməsi üçün Vergilər Nazirliyinə müraciət etdikdə isə ona bildirilib ki, Ali Məhkəmənin qərarında yalnız 1 111,98 manatının əmlakın hərracda satılması yolu ilə alınması hissəsi rədd edilib, 7 688,02 manat məbləğində borc isə silinməyib.

Qeyd olunanları nəzərə alaraq Vergi Apellyasiya Şurası “Qəbələ-Şərab” ASC-nin ərizəsinin baxılmamış saxlanılması barədə qərar qəbul edib.