Maliyyə

Ana səhifə

Maliyyə

Avropa İnvestisiya Bankı Azərbaycanda enerji layihələrini maliyyələşdirə biər

17 may 2011 12:34 (UTC +04:00)

Bakı. Əhməd Yusifzadə - APA-Economics. Avropa İnvestisiya Bankı (AİB) enerji mənbələrinin diversifikasiyası və enerji təchizatı ilə əlaqədar layihələrin maliyyələşdirilməsi üçün vəsait ayırmağa hazırdır. Bu barədə “APA-Economics”ə açıqlamasında AİB-in mətbuat katibi Duşan Ondreyçka bildirib.

“Azərbaycanla AİB arasında çərçivə sazişinin imzalanma vaxtı barədə konkret nəsə deyə bilmərik. Ancaq inanırıq ki, danışıqlar yaxın vaxtlarda başa çatacaq və saziş bu il imzalanacaq” - deyə D.Ondreyçka bildirib.

Onun sözlərinə görə, AİB Azərbaycanda, eləcə də Mərkəzi Asiya ölkələrində energetika, enerji nəqli və ətraf mühit sahələrində investisiya imkanlarını birləşdirməklə enerji mənbələrinin diversifikasiyası və enerji təchizatı ilə əlaqədar layihələrin maliyyələşdirilməsi üçün vəsait ayıra bilər: “Avropa Parlamentinin mandatı ilə energetika və ətraf mühit sahəsində layihələrə investisiya kapital qoyuluşları üçün nəzərdə tutulan regional kreditlərin məbləği 1 mlrd. dollar təşkil edir. Bundan başqa, AİB enerji effektivliyi və nəqlin təhlükəsizliyi üzrə Bank Fondundan enerji və ətraf mühitə dair layihələrin maliyyələşdirilməsi üçün 3 mlrd. avro həcmində kredit ayıra bilər”.

Qeyd edək ki, mənzil-qərargahı Lüksemburqda olan AİB Avropa İttifaqının (Aİ) maliyyə-kredit təsisatıdır. Bank 1958-ci ildə Aİ ölkələri üçün maraq doğuran obyektlərin tikintisi və rekonstruksiyası məqsədilə yaradılıb. AİB-in rəhbər orqanları İdarəedici Şura (Aİ ölkələrinin maliyyə nazirləri daxildir), Direktorat və İdarə Heyətidir.