Maliyyə

Ana səhifə

Maliyyə

Azərbaycan Dövlət Sosial Müdafiə Fondunun daxilolmaları 30% artıb

07 may 2012 11:28 (UTC +04:00)

Bakı. Vahab Rzayev - APA-Economics. İlkin məlumatlara əsasən, Azərbaycan Dövlət Sosial Müdafiə Fondunun (DSMF) 2012-ci ilin yanvar-aprel aylarında gəlirləri 799,2 mln. manat təşkil edib ki, bu da 2011-ci ilin müvafiq dövrünə nisbətən 30,2% çoxdur.

Fondun mətbuat xidmətindən “APA-Economics”ə verilən məlumata görə, hesabat dövründə icbari dövlət sosial sığorta haqları üzrə daxilolmalar 2011-ci ilin müvafiq dövrünə nisbətən 12,5% artaraq 407,2 mln. manat təşkil edib.

Məcburi dövlət sosial sığorta haqları üzrə daxilolmaların 60,0%-i və ya 224,4 mln. manatı qeyri-büdcə sektorunun payına düşür. Həmin sektorun ödədiyi məcburi dövlət sosial sığorta haqlarının məbləği əvvəlki ilə nisbətən 13,7% artıb, proqnoz isə 105,5% icra olunub. Bu dövrdə sahibkarlıq fəaliyyəti ilə məşğul olan fiziki şəxslərin sosial sığortaya cəlb edilməsi gücləndirilib ki, nəticədə fiziki şəxslər üzrə daxilolmalar 13,6% artıb.

Bu ilin yanvar-aprel aylarında büdcədən maliyyələşən təşkilatlar üzrə daxilolmalar 162,8 mln. manat təşkil edib. Həmin təşkilatların ödədiyi icbari dövlət sosial sığorta haqları əvvəlki ilin müvafiq dövrünə nisbətən 10,7% artıb, proqnoz 92,8% icra olunub. Daxilolmaların səviyyəsi pensiya və müavinətlərin vaxtında maliyyələşdirilməsinə imkan verib.

Yanvar-aprel aylarında DSMF-nin xərcləri 781,3 mln. manat olub. Hesabat dövründə pensiya və müavinətlərin maliyyələşdirilməsi üçün Fond tərəfindən 769,0 mln. manat vəsait yönəldilib ki, bu da əvvəlki ilin müvafiq dövrünə nisbətən 30,5% çoxdur. Pensiya xərcləri 2011-ci ilin müvafiq dövrünə nisbətən 31,4% artaraq 751,8 mln. manat təşkil edib. DSMF-nin digər xərcləri 12,3 mln. manat təşkil edib ki, bu da 2011-ci ilin müvafiq dövrünün göstəricisindən 1,2% çoxdur.

Ümumilikdə DSMF üzrə məcburi dövlət sosial sığorta haqlarının daxil olması proqnozu 100,02%, o cümlədən qeyri-büdcə təşkilatları üzrə 105,5%, büdcə təşkilatları üzrə isə 92,75% icra olunub.