Maliyyə

Ana səhifə

Maliyyə

«Standard&Poor’s» agentliyi Azərbaycanın bank sektoru üzrə yeni risk qiymətləndirməsi aparıb

14 may 2012 12:32 (UTC +04:00)

Bakı. Vahab Rzayev – APA-Economics. «Standard&Poor’s» beynəlxalq reytinq agentliyi Azərbaycanın bank sektorunun ölkə və sahə risklərini yenidən qiymətləndirərək Azərbaycanı 9-cu qrupdan 8-ci qrupa keçirib. Agentlikdən «APA-Economics»ə verilən məlumata görə, bundan başqa, Azərbaycan iqtisadi risklər üzrə 8-ci qrupdan 7-ci qrupa, sahə riskələri üzrə isə 9-cu qrupdan 8-ci qrupa keçirilib.

Qeyd edək ki, Agentliyin metodologiyasına görə, 1-ci qrup ən kiçik, 10-cu qrup isə ən yüksək risklərə aiddir. Azərbaycandan başqa 8-ci qrupda Argentina, Qazaxıstan, Özbəkistan, Nigeriya və Gürcüstan var.

Ölkəmizin iqtisadi risklər üzrə 7-ci qrupa daxil edilməsi ölkədə iqtisadi natarazlığın yaranması risklərinin ortadan aşağıya endirilməsi deməkdir.

Agentliyin fikrincə, ölkənin bank sektoru ekspansiya fazasını yaşayır. Proqnozlara görə, 2012-ci ildə kreditləşmənin artım tempi 10%-ə bərabər olacaq ki, bu da 2011-ci ilin göstəricisindən (8,1%) təxminən 2 faiz bəndi çoxdur. Eyni zamanda Agentlik bank kreditləşməsinin ÜDM-ə olan nisbətini (21%) kiçik kimi qiymətləndirir, lakin bu, həmçinin kreditləşmədə «qiymət şişirdilməsi»nin olmadığını əsaslandıran amil hesab olunur. Bundan başqa qeyd olunur ki, ipoteka kreditləri ölkənin bank sektoru üçün risk mənbəyi deyil ki, bütün bunları nəzərə alaraq kredit sahəsində iqtisadi natarazlığın yaranması riskləri aşağı kimi qiymətləndirilir. Agentlik həmçinin ölkədə korporativ və pərakəndə borcların aşağı səviyyə olduğunu vurğulayır.

Azərbaycanın sahə riskləri üzrə 8-ci qrupa daxil edilməsi bank sektorunda institusional sistem və resurs bazası ilə əlaqədar olan risklərin yüksək kimi qiymətləndirildiyini əks etdirir ki, nəticədə risklərin səviyyəsi «çox yüksək»dən «yüksək»ə dəyişdirilib.

Agentlik həmçinin bildirir ki, Mərkəzi Bank ölkənin bank sektoruna müdaxilə etmək imkanlara malikdir və bu səbəbdən bu sahədə preventiv tədbirlərin görülməsi imkanları genişdir. Bu baxımından Agentlik Mərkəzi Bankın böhran zamanı adekvat və vaxtında görülən tədbirləri müsbət qiymətləndirir və bildirir ki, bura həm likvidlik üzrə birbaşa dəstək, həm də pul-kredit alətlərinin istifadəsi aiddir. Nəticədə, Agentlik böhran zamanı əmanətçilər arasında banklara olan etibar və etimadın sabit qaldığını vurğulayır.

«S&P»-nin ekspertləri bildirirlər ki, son zamanlar hökumətin Azərbaycan Beynəlxalq Bankının özəlləşdirilməsinə hazırlıqları aktivləşsə də, bunun üçün Bankın kapitalı və resurs bazasının dövlət tərəfindən möhkəmləndirilməsi zəruridir. Ümumilikdə isə Agentlik bank sektorunda son zamanlar pərakəndə depozitlər hesabına resurs bazasının möhkəmlənməsini və eyni zamanda xaricdən cəlb olunmaların azalmasını müsbət qiymətləndirir.

Agentliyin qənaətinə görə, Azərbaycan hökuməti bank sistemi üçün yüksək və orta əhəmiyyətə malik olan banklara dəstək verməyə hazırdır və «S&P» həmin amili müsbət qiymətləndirir.