Maliyyə

Ana səhifə

Maliyyə

Azərbaycan Hesablama Palatası 2011-ci il dövlət büdcəsinin icrası ilə bağlı illik hesabatın parlamentin müzakirəsinə çıxarılmasına dair qərar qəbul edib

16 may 2012 11:01 (UTC +04:00)

Bakı. Elnur Hüseynquluyev – APA-Economics. Azərbaycan Hesablama Palatasının son kollegiya iclasında «Azərbaycan Respublikasının 2011-ci il dövlət büdcəsinin icrası haqqında» qanun layihəsinə və dövlət büdcəsinin icrasına dair illik hesabata palatanın rəyi müzakirə edilib.

Palatadan «APA-Economics»ə verilən məlumata görə, rəydə əsas diqqət 2011-ci ildə ölkə iqtisadiyyatını xarakterizə edən makroiqtisadi göstəricilərin və iqtisadiyyata təsir edən amillərin təhlilinə, dövlət büdcəsinin gəlir və xərc parametrlərinin mövcud iqtisadi potensialın imkanları ilə uzlaşmasının, həmçinin ayrı-ayrı dövlət tədbirləri, proqram və layihələrə ayrılmış vəsaitlərdən səmərəli istifadə edilməsinin araşdırılmasına, büdcənin icrasını xarakterizə edən göstəricilərin həyata keçirilmiş nəzarət tədbirlərinin nəticələri ilə əlaqələndirilməsinə, habelə «Azərbaycan Respublikasının 2011-ci il dövlət büdcəsi haqqında» qanunun ayrı-ayrı maddələrinin, həmçinin müəyyən olunmuş limit və hədlərin icrası vəziyyətinin təhlil edilməsinə yönəldilib.

Rəydə dövlət büdcəsi gəlirlərinin icra vəziyyəti vergi və digər gəlir mənbələri, tədiyyə və mülkiyyət növləri, habelə iri dövlət vergi ödəyiciləri üzrə araşdırılıb, xərclərin icra vəziyyəti isə funksional və iqtisadi təsnifatın bölmələri, köməkçi bölmələri və bəzi hallarda isə paraqrafları səviyyəsində dövlət idarəetmə orqanları və güc strukturları, sosial yönümlü sahələr, iqtisadiyyatın real sektoru və iqtisadi fəaliyyətin digər sahələri, habelə təsdiq edilmiş proqram və layihələr üzrə təhlil edilib.

Sonda rəy kollegiya iclasında geniş müzakirə edilərək təsdiq edilib. Palata tərəfindən «Azərbaycan Respublikasının 2011-ci il dövlət büdcəsinin icrası haqqında» qanun layihəsi və dövlət büdcəsinin icrası barədə illik hesabatın Milli Məclisdə müzakirəyə təqdim olunması barədə qərar qəbul edilib.