Maliyyə

Ana səhifə

Maliyyə

Səfir: “Azərbaycanla Serbiya arasındakı iqtisadi əlaqələri siyasi əlaqələr səviyyəsinə yüksəltmək istəyirik”

16 may 2012 13:41 (UTC +04:00)

Bakı. Nicat Mustafayev - APA-Economics. Serbiya Azərbaycanla mövcud iqtisadi əməkdaşlığı genişləndirmək niyyətindədir. «APA-Economics»in məlumatına görə, bunu Serbiyanın Azərbaycandakı səfiri Zoran Vayoviç bildirib.

Onun sözlərinə görə, hazırda Bakıda keçirilən XVIII Azərbaycan Beynəlxalq Qida Sənayesi Sərgisində («WorldFood Azerbaijan-2012») Serbiyanın 15-dək şirkəti iştirak edir: «Ümumiyyətlə, Serbiya Azərbaycanla kənd təsərrüfatı, qida sənayesi, aqrobiznes, İKT, əczaçılıq və turizm kimi sahələrdə əməkdaşlıq etmək və bununla da mövcud olan iqtisadi əməkdaşlığı bir qədər də inkişaf etdirmək niyyətindədir».

İki ölkə arasında siyasi əlaqələrin iqtisadi əlaqələrdən daha çox inkişaf etdiyini bildirən səfir onu da qeyd edib ki, Serbiya iki ölkə arasında iqtisadi əlaqələri də siyasi əməkdaşlığın səviyyəsinə çatdırmaqda maraqlıdır: «Son iki il ərzində Azərbaycan və Serbiya arasında iqtisadi əməkdaşlıq kifayət qədər inkişaf edib. Lakin ticarət dövriyyəsinin həcminə baxdıqda? görmək olar ki, ticarət əlaqələri istənilən səviyyədə deyil. Halbuki ticarət dövriyyəsinin artırılmasına böyük potensial mövcuddur».

Serbiyada avtomobil magistralının tikintisinə Azərbaycan tərəfindən kreditin ayrılmasını və yolun inşasında Azərbaycanın «Azvirt» şirkətinin iştirak etdiyini xatırladan Z.Vayoviç həmçinin bildirib ki, artıq aprel ayında avtomobil yolunun inşasına başlanılıb: «Sözügedən yolun tikintisinə Azərbaycan tərəfindən Serbiya hökumətinə ayrılan kredit iki ölkə arasında ticarət dövriyyəsinin bir qədər də artmasına səbəb olacaq».

Qeyd edək ki, 2011-ci ildə Azərbaycan və Serbiya arasında ticarət dövriyyəsinin həcmi 2 772,3 min ABŞ dolları təşkil edib.