Maliyyə

Ana səhifə

Maliyyə

Azərbaycanda POS-terminalların quraşdırılması istiqamətində görülən işlərlə bağlı geniş toplantı keçirilib

17 may 2012 13:41 (UTC +04:00)

Bakı - APA-Economics. Azərbaycanda əhali ilə nağdsız hesablaşmaların aparılması, POS-terminalların quraşdırılması istiqamətində görülən işlərlə bağlı Vergilər Nazirliyində toplantı keçirilib.
Nazirlikdən “APA-Economics”ə verilən məlumata görə, toplantıda Vergilər, İqtisadi İnkişaf, Nəqliyyat, Rabitə və İnformasiya Texnologiyaları nazirliklərinin, eləcə də Mərkəzi Bankın rəhbər vəzifəli şəxsləri, bank və biznes sektorunun nümayəndələri iştirak edib.
Tədbirdə ölkə iqtisadiyyatında nağdsız ödənişlərin həcminin yüksəldilməsi, alqı-satqı əməliyyatları üzrə hesablaşmalarda plastik kartlardan istifadənin miqyasının genişləndirilməsi, eləcə də POS-terminalların quraşdırılması istiqamətində görülən işlərlə bağlı məsələlər müzakirə edilib. Toplantıda çıxış edən vergilər naziri Fazil Məmmədov ölkə ərazisində aparılan əməliyyatların nağdsız qaydada həyata keçirilməsi ilə bağlı prezident İlham Əliyev tərəfindən aidiyyəti dövlət qurumlarına verilmiş tapşırıqların icra vəziyyəti barədə məlumat verib. Qeyd olunub ki, bu istiqamətdə görüləcək işlərin icrasına nəzarət etmək məqsədilə xüsusi qərargah yaradılıb. Bu Qərargahın fəaliyyəti, işlərin koordinasiyalı şəkildə qurulması, eləcə də prosessinq mərkəzləri ilə aparılmış danışıqlar nəticəsində POS-terminalların qeydiyyatı, quraşdırılması və tətbiqi prosesinin sadələşdirilməsi ümumilikdə ticarət və xidmət obyektlərinin POS-terminallarla təchiz olunması prosesinə təkan verib, qısa müddət ərzində ciddi dəyişikliklərə nail olunub.
Bank ekvayerlərinin prosesə fəal şəkildə qoşulması nəticəsində zəruri sayda POS-terminalların ölkəyə gətirilməsi təmin edilib, 2012-ci ilin fevral ayından 2012-ci ilin may ayının 15-dək Bakıda 14 min obyektdə 17 mindən çox POS-terminal qeydiyyatdan keçirilib. Bütövlükdə respublikanın bütün ərazisində, xüsusilə Bakı şəhəri və turizm xəritəsinə aid olan mərkəzlərdə fəaliyyət göstərən mehmanxanalarda, ticarət, iaşə, istirahət və əyləncə obyektlərində, taksilərdə, yanacaqdoldurma məntəqələrində, tibb xidməti göstərən, əczaçılıq mallarının satışı ilə məşğul olan obyektlərdə və digər sahələrdə POS-terminalların quraşdırılması işi əsasən yekunlaşdırılıb. Hazırda respublika üzrə 26 443 obyektdə 30 940 aktiv POS-terminal qeydiyyata alınıb ki, bunun da 93,7%-i və ya 28 976 ədədi Bakı şəhərinin ərazisində yerləşən obyektlərdədir.
Nəqliyyat sektorunda da POS-terminalların quraşdırılması işləri sürətlə davam etdirilir. Hazırda 830-dan yuxarı taksidə POS-terminalların quraşdırılması başa çatıb. Nəqliyyat vasitələrində tətbiq olunan POS-terminallar beynəlxalq tranzaksiya sisteminə inteqrasiyanı dəstəkləməklə yanaşı, onlardan istifadə edən şəxslərin xarici bank hesabları üzrə plastik kartlarını oxumaq imkanına da malikdir.
Bundan başqa, nağdsız ödənişlərin stimullaşdırılması və POS-terminallardan istifadə barədə əhalinin məlumatlandırılması və maarifləndirilməsinə dair xüsusi Tədbirlər Planı hazırlanıb həyata keçirilib. Həmin plan çərçivəsində vergi ödəyicilərinin və əhalinin fəal maarifləndirilmə işinə başlanıb, nağdsız hesablaşmaların üstünlükləri, ödəniş kartları və POS-terminallara dair 30 mindən yuxarı buklet hazırlanaraq aidiyyəti üzrə paylanıb. Nağdsız hesablaşmaların üstünlüklərini təbliğ etmək üçün KİV-in imkanları səfərbər edilib, reklam çarxları hazırlanıb, sosial şəbəkələrdə təbliğat işi aparılıb.
Tədbir iştirakçıları bu prosesin davamlı xarakter daşımasının vacibliyini vurğulayıblar. Toplantıda nağdsız ödənişlərin genişləndirilməsi, POS-terminallardan istifadənin artırılması sahəsində müvafiq strukturların üzərinə düşən işlərin koordinasiyası ilə bağlı fikir mübadiləsi aparılıb. Müzakirələrdə rabitə və informasiya texnologiyaları nazirinin müavini İltimas Məmmədov, iqtisadi inkişaf nazirinin müavini Niyazi Səfərov, nəqliyyat nazirinin müavini Musa Pənahov, Mərkəzi Bank sədrinin birinci müavini Alim Quliyev, eləcə də biznes və bank sektorunun nümayəndələri çıxış edərək, məsələ ilə bağlı öz fikir və təkliflərini bildiriblər.