MDB

Ana səhifə

MDB

Ukraynada jurnalistin qətli ilə bağlı DİN generalına rəsmən ittiham irəli sürülüb

24 iyul 2009 12:53 (UTC +04:00)

Bakı – APA. Ukrayna Baş Prokurorluğu DİN-in Baş Cinayət Axtarışı İdarəsinin rəisi Aleksey Pukaça rəsmi ittiham irəli sürüb. APA-nın “İnterfax”a istinadən xəbərinə görə, bu barədə Ukraynanın baş prokuroru Aleksandr Medvedko məlumat verib.
Baş prokuror bildirib ki, A.Pukaça qarşı qətldə iştirak, adam oğurluğu və rəsmi sənədlərin məhv edilməsi ittihamları irəli sürülüb. O, jurnalist Georgi Qonqadzenin qətlində təqsirləndirilir.
Qeyd edək ki, “Ukrainskaya pravda” internet nəşrinin qurucusu G.Qonqadze 2000-ci ildə qətlə yetirilib. İstintaqın versiyasına görə, o vaxt Ukrayna DİN-in Baş Cinayət Axtarışı İdarəsinin rəisi olan general A.Pukaç jurnalistin izlənməsinə və oğurlanmasına rəhbərlik edib, sonda isə G.Qonqadzeni öz əlləri ilə boğub. 2003-cü ildə generalı jurnalistin izlənilməsinə dair sənədləri məhv etmək ittihamı ilə həbs ediblər. Az sonra bu, başqa yerə getməmək qəti-imkan tədbiri ilə əvəzlənib. Elə o vaxtdan A.Pukaç yoxa çıxıb. 2005-ci ildə Ukrayna prezidenti Viktor Yuşşenko Qonqadze cinayətinin açıldığını elan etdikdən sonra generala qarşı qətl ittihamı irəli sürülüb və onun barəsində beynəlxalq axtarış elan olunub. General bu il iyulun 21-də Jitomir vilayətində ələ keçib.
Xatırladaq ki, G.Qonqadzenin qətlinə görə Ukrayna DİN-in zahiri müşahidə və kriminal kəşfiyyat departamentinin əməkdaşları Nikolay Protasov, Valeri Kostenko və Aleksandr Popoviç müvafiq olaraq 13, 12 və 12 il müddətinə azadlıqdan məhrum ediliblər. Onlardan heç biri özlərini tam təqsirli bilməyiblər. Üstəlik, cinayətin sifarişçisi də müəyyənləşdirilməyib. Ukrayna prezidentinin mühafizə xidmətinin rəhbəri Nikolay Melniçenko qətldə o vaxtkı prezident Leonid Kuçmanı ittiham edərək ortaya audiolent çıxarsa da, lentdəki səsin Kuçmaya məxsus olduğu təsdiqlənməyib.