Bakı. Vahab Rzayev – APA-Economics. Azərbaycanın «Unibank» ASC-nin İdarə Heyətinin sədr müavini, pərakəndə bank xidmətləri üzrə direktor Xalid Əhədov «MilliKart» MMC-nin Direktorlar Şurasının sədri seçilib. Bankdan «APA-Economics»ə verilən məlumata görə, əsas məqsədi Azərbaycanda nağdsız əməliyyatların sürətli inkişafının dəstəklənməsi olan «MilliKart» MMC bu istiqamətdə üzv banklara daha rahat və keyfiyyətli xidmətlərin göstərilməsini təmin edir.
Qeyd edək ki, 2006-cı ilin oktyabrında fəaliyyətə başlayan «MilliKart» Prosesinq Mərkəzi 18 bank tərəfindən nizamnamə kapitalı 4 mln. manat olmaqla təsis edilib, sonradan təsisçilərin sırasına Avropa Yenidənqurma və İnkişaf Bankı (10%) da daxil olub, nizamnamə kapitalı isə 5 mln. manata çatdırılıb.
Hazırda «MilliKart»da 11 bank xidmət olunur. Həmin banklar tərəfindən 250 mindən artıq ödəniş kartları emissiya edilib, 330-dan artıq bankomat və 7 mindən artıq POS-terminal quraşdırılıb.