Sənaye və energetika

Ana səhifə

Bu gün Avropa İttifaqı və Türkiyə rəsmiləri «Nabucco» layihəsi üzrə Ankarada görüşlər keçirəcək

06 noyabr 2008 07:38 (UTC +04:00)

Bakı. Rəşad Süleymanov – APA-Economics. Avropa İttifaqının (Aİ) enerji məsələləri üzrə komissarı Andris Piebalqs bu gün işgüzar səfərlə Türkiyəyə gəlib.
«APA-Economics»in Türkiyə mətbuatına istinadən verdiyi məlumata görə, A.Piebalqs artıq bu gün Ankarada Türkiyə rəsmiləri ilə görüşəcək. Prezident Abdullah Gül və baş nazir Rəcəb Tayyip Ərdoğanla bir araya gələcək Aİ rəsmisinin «Nabucco» boru kəməri ilə nəql ediləcək qazın qiyməti ilə bağlı müzakirələr aparacaq. A.Piebalqsın qaz tranziti tarifləri ilə bağlı Türkiyə ilə Aİ arasında yaranmış anlaşılmazlığı nizamlamağa çalışdığı qeyd olunur.
Qeyd edək ki, «Nabucco» konsorsiumunun üzvü olan Türkiyə boru kəməri ilə Avropaya nəql olunacaq qazın 15%-ni aşağı qiymətlərlə almaq istədiyini bəyan edib. Lakin Aİ və əsas ixracatçı olacaq Azərbaycanın bunun əleyhinə olduğu bildirilir.
Xatırladaq ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.
İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildə Avropaya çatdırılması planlaşdırılır.