Sənaye və energetika

Ana səhifə

ARDNŞ “Bulla-dəniz” yatağında 29 saylı platformanın modernləşdirilməsinə başlayıb

06 yanvar 2010 15:30 (UTC +04:00)

Bakı. Rəşad Süleymanov – APA-Economics. Azərbaycan Dövlət Neft Şirkəti (ARDNŞ) “Bulla-dəniz” yatağında fəaliyyət göstərən 29 saylı platformanın tam modernləşdirilməsinə başlayıb. Bu barədə «APA-Economics»ə ARDNŞ-dən məlumat verilib.

Adıçəkilən platforma 4 əlavə blok hesabına genişləndirilir. Yeni bloklardan 3-ü (hər birinin hündürlüyü 43 metr, çəkisi isə 170 ton) Heydər Əliyev adına Dərin Özüllər Zavodunda, 1 blok isə “Neftqaztikinti” Trestinin Zığ tikinti-quraşdırma meydançasında inşa edilib.

Obyektin sifarişçisi “Bulla-dəniz” yatağını istismar edən “Nərimanovneft” NQÇİ, baş podratçısı isə “Neftqaztikinti” Trestidir. Yaxın günlərdə yeni bloklar “General Əliağa Şıxlinski” kran-gəmisi vasitəsilə dənizin 34 metr dərinliyində artıq fəaliyyət göstərən platformaya gətirilib quraşdırılacaq.

Platforma quraşdırılandan sonra orada qazma işlərinə başlanılacaq. Buradan ilk olaraq 5700 metr dərinliyə 90 saylı quyunun qazılması nəzərdə tutulur. Quyu məhsuldar qatın VIII horizontuna qazılacaq. Həmin quyudan yaxşı nəticə əldə edilərsə, yaxınlıqda ikinci quyu da qazıla bilər.

Qeyd edək ki, 1973-cü ildə aşkar edilən “Bulla-dəniz” yatağı 1975-ci ildən istismar olunur. Uzunluğu 27 kilometr, eni isə 9 kilometr təşkil edən “Bulla-dəniz” yatağında 1980-ci illərin əvvəllərində Avropada ən dərin quyu qazılıb.