Sənaye və energetika

Ana səhifə

“Azərenerji” Cəlilabad rayonunda «smart-kart»lı sayğaclar quraşdırır

11 yanvar 2010 12:29 (UTC +04:00)

Bakı. Rəşad Süleymanov - APA-Economics. Azərbaycanın Cəlilabad rayonunda elektrik enerjisi istifadəçiləri «smart-kart»lı sayğaclarla təchiz olunur. Bu barədə «APA-Economics»ə “Azərenerji” ASC-nin mətbuat xidmətindən məlumat verilib.

Ötən ilin noyabr ayında başlamış sayğaclaşdırma prosesi çərçivəsində bu günədək 9300 fərdi məişət abonenti olan Cəlilabad rayonunun mərkəzində 1000-ə yaxın abonent «smart-kart»la işləyən sayğac quraşdırılıb. Sayğaclaşdırma prosesi cari ilin ortalarına qədər tamamlanacaq.

Qeyd edək ki, bütün müdaxilə halları «smart-kart»lı sayğacın yaddaşında qeydə alınır, “smart kart”ı bağlanır və enerji təchizatı dayanır. Pozuntu aradan qaldırılmamış kartın aktivləşməsi və enerji təchizatının bərpası mümkün olmur. Bundan başqa, limit tam qurtardıqdan sonra kartı təkrarən sayğaca daxil etməklə kredit almaq mümkündür. Eyni zamanda proqram təminatında onun “yaddaş”ında rəsmi bayram günləri barədə məlumat yerləşdirilib. Bu sayğaclardan istifadə edən abonentlər kart tam boşaldıqdan sonra, hətta əvvəlcədən ödəniş etməsələr belə, Yeni il bayramında üç, Novruz bayramında isə iki gün elektrik enerjisini fasiləsiz almaq imkanı var. Kart yenidən aktivləşdirildikdə kreditin məbləği nəzərə alınır.

Xatırladaq ki, bu günədək Mingəçevir və Gəncə şəhərlərində «smart-kart»lı sayğacların quraşdırılması tam başa çatdırılıb. Hazırda Şirvan, Yevlax, Salyan, Sabirabad, Hacıqabul rayon mərkəzlərində bu tip sayğacların quraşdırılması prosesi gedir.