Sənaye və energetika

Ana səhifə

Batumidə beynəlxalq enerji konfransı keçirilir

14 yanvar 2010 14:02 (UTC +04:00)

Batumi. Nizami Məmmədzadə - APA. Bu gün Gürcüstanın Batumi şəhərində beynəlxalq enerji konfransı işə başlayıb.

APA-nın Gürcüstan bürosunun məlumatına görə, konfrans bu saatlarda işə başlayıb və Gürcüstanın baş naziri Nika Gilauri açılış nitqi ilə çıxış edib.

Konfransa Azərbaycanın baş naziri Artur Rasizadənin rəhbərlik etdiyi nümayəndə heyəti qatılıb. Nümayəndə heyətində sənaye və energetika naziri Natiq Əliyev, xarici işlər nazirinin müavini Xələf Xələfov, Azərbaycanın Gürcüstandakı səfiri Namiq Əliyev və digər şəxslər təmsil olunur. Ümumilikdə enerji konfransında 10 ölkədən nümayəndə heyətləri iştirak edir.

Konfransda «Nabucco» layihəsi, Cənubi Qafqaz regionunda enerji təhlükəsizliyi, enerji dəhlizlərinin inkişafı və s. məsələlər müzakirə olunacaq.

Qeyd edək ki, bu gün Batumidə dövlət başçılarının iştirakı ilə Enerji Konfransının keçirilməsi planlaşdırılsa da, dünən axşam saatlarında sammitin keçirilməsinin təxirə salındığı bildirilib. Bu səbəbdən sammit enerji konfransı ilə əvəzlənib.