Sənaye və energetika

Ana səhifə

Azərbaycan Dövlət Neft Şirkəti «Qərbi Abşeron» dəniz yatağında yeni hasilat platformasında quraşdırma işlərinə başlayıb

19 yanvar 2010 13:37 (UTC +04:00)

Bakı. Rəşad Süleymanov – APA-Economics. Azərbaycan Dövlət Neft Şirkətinin (ARDNŞ) «Neftqaztikinti» Tresti Xəzər dənizinin Azərbaycan sektorundakı «Qərbi Abşeron» yatağında yerləşən 57 nömrəli yeni hasilat platformasında quraşdırma və bərkitmə işlərinə başlayıb. Bu barədə «APA-Economics»ə ARDNŞ-dan məlumat verilib.

Yatağın işlənilməsi «Abşeronneft» NQÇİ tərəfindən həyata keçirilir. Dənizin 16 metr dərinliyində quraşdırılan platforma 4 blokdan ibarətdir. Blokların hər biri 16 metr hündürlüyündədir. Bu nöqtədə «Xəzər-4» üzən qazma qurğusu vasitəsilə 4 quyu qazılıb və artıq quyular istismara hazır vəziyyətdədir. Platforma quraşdırıldıqdan sonra quyular istismara daxil ediləcək.

Şirkətdən bildirilib ki, 2010-cu ildə işlənilməsi nəzərdə tutulan layihələr arasında bu yataq xüsusi yer tutur. Proqrma uyğun olaraq, bu məqsədlə daha öncə quraşdırılmış 3 platforma modernləşdiriləcək, onların arasında neft kəmərləri çəkiləcək və istismara buraxılacaq.

Qeyd edək ki, «Qərbi Abşeron» yatağı 1985-ci ildə açılmasına baxmayaraq kəmərlər və digər infrastrukturların olmaması səbəbindən hələ də tam şəkildə tədqiq edilməyib. Son hesablamalara əsasən, yataqda 2 mln. ton həcmində çıxarılabilən neft ehtiyatı mövcuddur. Burada mövcud olan quyuların dərinliyi 700-750 metrdir və hər birinin sutkalıq neft hasilatı orta hesabla 5-6 ton təşkil edir.