Sənaye və energetika

Ana səhifə

«SOCAR-Georgia Gas» şirkəti bu il Gürcüstanda daha 48 min abonenti qazla təmin edəcək

20 yanvar 2010 15:25 (UTC +04:00)

Tiflis. Nizami Məmmədzadə - APA. «SOCAR-Georgia Gas» şirkəti Gürcüstan Energetika Nazirliyi ilə müqaviləsi əsasında ötən il ölkənin qaz sektoruna 18 mln. lari həcmində investisiya yatırıb. APA-nın Gürcüstan bürosunun məlumatına görə, bunu jurnalistlərə «SOCAR-Georgia Gas» şirkətinin rəhbəri Anar Məmmədov bildirib.

A.Məmmədovun sözlərinə görə, bu il şirkət müqaviləyə əsasən 8 mln. lari məbləğində reabilitasiya işi aparacaq. Burada yeni tikililər də nəzərdə tutulub.

«Keçən il azərbaycanlılar yaşayan bölgələrdə qazlaşdırma sürətlə gedib. Soydaşlarımız yaşayan Marneuli rayon mərkəzi tam qazlaşdırılıb. Dmanisi, Laqodexi və Saqareco bölgələrində soydaşlarımız yaşayan kəndlərə də qaz kəməri çəkilib. Qardabani rayon mərkəzində böyük reabilitasiya işləri davam etdirilir. Şirkətimiz indiyədək Gürcüstanın dağlıq ərazisində yerləşən 30-a qədər kəndi qazlaşdırıb. Ümumiyyətlə, Gürcüstan əhalisinin təxminən 60%-i qazla təmin olunub. «SOCAR-Georgia Gas» Gürcüstan hökuməti qarşısında 40 mln. dollar həcmində öhdəlik götürüb. Biz Gürcüstanda müqaviləyə əsasən 150 min abonentə qaz verməliyik, 2010-cu ildə bu rəqəm 48 min olmalıdır. Hələlik şirkətimizin 30 regionda qaz idarəsi var. Hazırda işlərimiz uğurla davam etdirilir. Köhnə borular yeniləri ilə əvəz edilir», - deyə A.Məmmədov vurğulayıb.

Qeyd edək ki, «SOCAR-Georgia Gas» şirkəti Tiflisdə nəşr olunan «Saxelebi» («Adlar») adlı birillik ensiklopedik jurnalın təsis etdiyi nominasiyada «Qızıl» mükafata layiq görüıüb və «İlin ən üğurlu şirkəti» adlandırılıb. Həmin tədbirdə eyni zamanda Kulevi Neft Terminalı da eyni nominasiya qalib elan olunub.