Sosial

Ana səhifə

Sosial

Təhsil Nazirliyində “Ən yaxşı müəllim” müsabiqəsi ilə bağlı müşavirə keçirilib

14 aprel 2009 14:51 (UTC +04:00)

Bakı. İlhamə İsabalayeva-APA. Bu gün Təhsil Nazirliyində (TN) “Ən yaxşı müəllim” müsabiqəsinin II mərhələsini keçirən fənn komissiyalarının üzvləri, bu mərhələ üzrə təyin olunmuş məktəblərin direktorları və direktor müavinlərinin iştirakı ilə müşavirə keçirilib. Nazirliyin mətbuat xidmətindən APA-ya verilən məlumata görə, müşavirəni giriş sözü ilə açan nazir dövlət başçısının 2007-ci il sentyabrın 4-də verdiyi sərəncamı əsasında ölkəmizdə “Ən yaxşı müəllim” və “Ən yaxşı ümumtəhsil məktəbi” müsabiqələrinin keçirildiyini qeyd edib. Ötən il olduğu kimi, bu il də müsabiqələrlə əlaqədar TN-də Təşkilat Komitəsinin yaradıldığını bildirən M. Mərdanov iştirak üçün 450 nəfərin ərizəsinin həmin komitəyə daxil olduğunu nəzərə çatdırıb. Nazir əlavə edib ki, müvafiq ekspertiza 4 nəfərin sənədinin müəyyən şərtlərə uyğun gəlmədiyini aşkarlayıb. M. Mərdanov sənədləri qəbul olunmuş müəllimlərin göstəricilərinin müvafiq əmsallar tətbiq edilməklə 16 parametr üzrə qiymətləndirildiyini və 10 ballıq sistemə uyğunlaşdırıldığını, habelə 217 nəfərin növbəti mərhələyə buraxıldığını bildirib.
Müşavirədə nazir II mərhələdə iştirak edən müəllimlərin sınaq dərsləri keçməsi üçün hər fənn üzrə ayrı-ayrı məktəblərin, ümumilikdə bu məqsədlə Bakı şəhərində 35 orta təhsil müəssisəsinin müəyyənləşdirildiyini vurğulayıb.
Nazir dinləniləcək dərslərin qiymətləndirilməsi meyarlarını, fənn komissiyalarının tərkibinə ötən il keçirilmiş müsabiqə qaliblərindən 31 nəfərin daxil ediləcəyini, II mərhələyə keçən müəllimlərlə görüş təşkil olunacağını iştirakçıların diqqətinə çatdırıb.
Tədbirdə o da məlum olub ki, iştirakçılar arasında ibtidai sinif müəllimlərinin sayı 46 nəfərdir. Digər fənlər üzrə müəllimlərin sayı – ingilis dili 44, tarix 27, riyaziyyat 19, Azərbaycan dili və ədəbiyyat 18, biologiya 15, fizika və kimya fənlərinin hər biri 10, coğrafiya 8, informatika 6, rus dili 4, alman və fransız dilləri, musiqi, fiziki tərbiyə və iqtisadiyyatın əsasları üzrə hər biri 2 nəfərdir. Müsabiqədə 40 rayon və şəhərin, TN-nin nəzdindəki lisey və gimnaziyaların, universitetlərin nəzdindəki məktəblərin və 1 özəl məktəbin müəllimləri təmsil olunur.
Sonda “Ən yaxşı müəllim” müsabiqəsinin II mərhələsi üzrə sınaq dərslərinin aprelin 20-dən etibarən dinlənilməsinə başlanılacağı qeyd olunub.