Sosial

Ana səhifə

Sosial

Qahirə Universitetində “Azərbaycan günü” keçirilib - FOTO

Qahirə Universitetində “Azərbaycan günü” keçirilib - <font color=red>FOTO</font>

19 dekabr 2011 07:38 (UTC +04:00)

Bakı-APA. Misirin Qahirə Universitetində Azərbaycan Respublikasının dövlət müstəqilliyinin bərpasının 20 illiyi ilə əlaqədar “Azərbaycan günü” keçirilib. Azərbaycanın Misir Ərəb Respublikasındakı səfirliyindən APA-ya verilən məlumata görə, tədbirdə Qahirə universitetinin müəllim-tələbə kollektivi, elmi tədqiqatçılar, Misirdə təhsil alan və Afrika, Cənub və Cənub-Şərqi Asiya ölkələrindən olan digər əcnəbi tələbələr iştirak edib.
Tədbiri giriş sözü ilə açan Qahirə Universitetinin professoru Əli Moein Azərbaycan və Misir xalqları arasındakı dərin tarixi köklərə malik əlaqələrdən danışaraq, gənc nəslin bu əlaqələr barədə məlumatlandırılmasının vacibliyinə toxunmuş və bu xüsusda universitetində təşkil olunan “Azərbaycan günü”nün praktiki əhəmiyyətini vurğulayıb.
Səfir Ş. Abdullayev çıxış edərək, tədbir iştirakçılarına Azərbaycan xalqının tarixi təşəkkülü, Azərbaycan ədəbiyyatının parlaq nümunələri olan Nizami Gəncəvi, İmadəddin Nəsimi və Məhəmməd Füzulinin həyat və yaradıcılığı, xalqımızın xalçaçılıq və xalq tətbiqi sənət inciləri, ölkənin milli müstəqillik yolu, Ermənistan-Azərbaycan Dağlıq Qarabağ münaqişəsi və onun törətdiyi fəsadlar, münaqişənin tənzimlənməsinə dair Azərbaycanın baxışları barədə məlumat verib.
Azərbaycanın ərəb dünyası ilə əlaqələrindən danışan səfir Ş.Abdullayev zəngin İslam irsi və tarixi əlaqələr əsasında müstəqilliyinin ilk illərindən Azərbaycanın ərəb dünyası ilə sıx münasibətlərinin formalaşdığını və bu xüsusda Misir ilə əlaqələrin xüsusi önəm kəsb etdiyini vurğulayıb.
Qahirə universitetinin professoru Atef Əbdül Həmid Azərbaycanın tarixən şərq və qərb arasında, sivilizasiyalararası münasibətlərdə və İslam dünyasının tarixində mühüm rol oynadığını, Azərbaycan torpaqlarının Ermənistan tərəfindən işğalını və Misir-Azərbaycan əlaqələrinin dərin tarixi köklərə malik olduğunu qeyd edib.
Misirdə yaşayan Azərbaycan icmasının nümayəndəsi Seymur Nəsirov ərəb tarixi mənbələri əsasında apardığı elmi tədqiqatın nəticələrini təqdim edərək, XV əsrdə Misirin baş həkimi olmuş və əslən Azərbaycandan olan həkim Fəthullah İbn Nəfis və digərlərinin həyat və yaradıcılığı barəsində məlumat verib.
Tədbir çərçivəsində Seymur Nəsirovun müəllifi olduğu və Azərbaycanın Misirdəki səfirliyinin dəstəyi ilə ərəb dilində yeni çapdan çıxmış “Azərbaycan ərəb və Misir tarixi mənbələrində” adlı kitabın təqdimatı keçirilib.

Tədbirdə Azərbaycanın tarixi, mədəniyyəti, iqtisadiyyatı, Ermənistan-Azərbaycan Dağlıq Qarabağ münaqişəsi və Xocalı faciəsi haqqında film nümayiş olunub.

Qahirə Universiteti _ Azərbaycan