Sosial

Ana səhifə

Sosial

“Gürcüstan qanunları” kitabının təqdimatı keçirilib

20 dekabr 2011 12:18 (UTC +04:00)

Bakı. Azər Mustafayev – APA. Qafqaz Araşdırmalar Mərkəzi və Gürcüstandakı “Qeyrət” Xalq Hərəkatı “Gürcüstan qanunları” adlı kitabın təqdimatını keçirib. APA-nın məlumatına görə, tədbirdə Gürcüstanda yaşayan azərbaycanlıların təhsil, torpaq sahəsindəki mövcud problemləri müzakirə olunub, tarixi yer adlarının bərpası üçün yerli icra hakimiyyətlərinə müraciət olunması təklifi irəli sürülüb.

Kitabın redaktoru Kamran Ramazanlı deyib ki, Gürcüstan qanunlarının Azərbaycan dilinə tərcümə olunması və kitab halına salınmasında əsas məqsəd gürcü dilini bilməyən soydaşlarımızın ölkə qanunları ilə tanış olmasına şərait yaratmaqdır. “Qeyrət” Xalq Hərəkatının sədri Əlibala Əsgərov isə bildirib ki, bu kitab gürcüstanlı soydaşlarımız üçün önəmlidir: “Nəzərə alsaq ki, Gürcüstanda təxminən 500 min (rəsmi statistikaya görə 284 min) azərbaycanlı yaşayır və onların çox hissəsi gürcü dilini bilmir, onda bu kitabın əhəmiyyəti başa düşülər. Qanunlarda biz Gürcüstan vətəndaşı olsaq da, reallıqda belə deyil. Bu dövlətdə bizə ikili yanaşma var. Gürcü dilini bilmədiyimiz üçün kadr problemi yaradılır. Məktəblər təmir olunmur, dərslik problemi var. Gürcüstanda çap olunan dərsliklər baha olduğu üçün almağa imkanımız çatmır. Təhsil gürcü dilindədir. Azsaylı xalqlar öz dilində yalnız “ana dili” fənni üzrə təhsil ala bilər, qalan bütün fənlər məcburi olaraq gürcü dilində tədris edilməlidir. Tarixi yer adlarımız məqsədli şəkildə gürcüləşdirilir. Əhalinin maddi vəziyyəti ağır olaraq qalır. Əhali qazanc dalınca Ukrayna, Rusiya və Türkiyəyə üz tutub. Borçalını itirmək istəmiriksə Azərbaycan dövləti vaxtında müəyyən işlər görməlidir”.

Sonda Gürcüstanda yaşayan azərbaycanlıların problemlərini daim diqqətdə saxladıqları üçün bəzi mətbu orqanlara və televiziyalara mükafatlar verilib.