Sosial

Ana səhifə

Sosial

ETSN: “Azərbaycan ərazisində ceyranların mühafizəsi, reintroduksiyası və tarixi areallarının yenidən bərpası” layihəsi uğurla həyata keçirilir

24 dekabr 2011 15:25 (UTC +04:00)

Bakı-APA. ““Azərbaycan ərazisində ceyranların mühafizəsi, reintroduksiyası və tarixi areallarının yenidən bərpası” layihəsinə 2010-cu ildə start verilib. Layihəyə hazırlıq işləri isə 1,5 il öncədən başlanıb. Bu müddətdə layihənin həyata keçirilməsi üçün potensial təbiət əraziləri, yem və su bazası öyrənilib, real təhlükə mənbələrinin aradan qaldırılması üçün zəruri işlər həyata keçirilmiş, ceyranların tutulması, daşınması və təbii şəraitə adaptasiyası üçün xüsusi metodika müəyyən edilib”. Bu barədə APA-ya Ekologiya və Təbii Sərvətlər Nazirliyinin mətbuat xidmətindən daxil olan məlumatda bildirilib.

Qeyd olunan fəaliyyətlər Ekologiya və Təbii Sərvətlər Nazirliyi tərəfindən layihənin rəsmi tərəfdaşları olan Ümumdünya Vəhşi Təbiətin Mühafizəsi Fondunun (WWF) Qafqaz ofisi və Almaniya Beynəlxalq Əməkdaşlıq Cəmiyyətinin (GİZ) Azərbaycan Nümayəndəliyi ilə birlikdə həyata keçirilmiş, icra prosesində bilavasitə ukraynalı, almaniyalı mütəxəssislər ölkəmizə səfər edərək lazımi göstərişlərini veriblər. Layihənin icrası üçün tələb olunan avadanlıqlar - ən müasir keyidici silah, tor və tələ avadanlıqları, peyk vasitəsilə siqnalötürücü xaltalar, simsiz rabitə vasitələri alınıb. Bu avadanlıqlardan istifadə edilərək ceyranların həyat təhlükəsizliyi təmin olunur və hərəkətlərinin nəzarəti həyata keçirilir. Həmçinin yerli icma nümayəndələri, xüsusən fermerlərdən ceyranların həyat və təhlükəsizliyinin təminatı üçün məsuliyyət daşımaları barədə iltizamnamələr alınıb.

Layihənin digər rəsmi tərəfdaşı isə “Heydər Əliyev Fondu”dur. Fondun nümayəndələrinin Layihə üzrə aparılan təbliğat işlərində iştirakı aksiyanın uğurlu nəticələri və insanların - yerli icmaların məsələyə daha məsuliyyətli yanaşması üçün əhəmiyyətli olub.
Layihənin başlanmasından keçən dövr ərzində potensial reintroduksiya ərazilərindən Ağgöl Milli Parkı ərazisinə 19, Qobustan-Cəngiçay ərazisinə 39, Acınohur-Sarıca düzü ərazisinə 40 baş ceyran buraxılıb. Müvafiq ərazilərdə ceyranların boyunlarına bağlanmış xüsusi xaltalarla onların hərəkətləri barədə gündə bir neçə dəfə peyk vasitəsilə məlumatlar alınır. Ağgöl Milli Parkına buraxılmış ceyranlar ərazinin yem bazasına öyrəşmək üçün bir müddət Milli Park ərazisində yaradılmış süni volyerdə adaptasiya keçdikdən sonra vəhşi təbiətə buraxılmış və kiçik ceyran sürüsü əraziyə uyğunlaşaraq 2010-cu ilin may ayında balalayıb. 24 dekabr 2011-ci il tarixində aparılmış monitorinqin nəticəsinə əsasən ərazidə 21 baş ceyran müşahidə edilib.

Qobustan-Cəngiçay ərazisinə buraxılmış ceyranlar ilk vaxtlardan 2-3 qrupa bölünərək hərəkət ediblər. ETSN-nin mütəxəssisləri 24 dekabr 2011-ci il tarixində WWF-in Azərbaycan Nümayəndəliyinin üzvləri ilə birlikdə ərazidə apardıqları monitorinq zamanı Pirəkəşkül qəsəbəsinin cənub istiqamətində, o cümlədən Bakı-Şamaxı yolunun 47-ci və 50-ci kilometrliklərində müxtəlif ceyran qruplarına rast gəliblər.

Sahəsi təqribən 24 min hektaradək olan Acınohur–Sarıca düzünə buraxılmış ceyran sürüsü hazırda 50 min hektaradək ərazidə hərəkət edir. Son günlərin araşdırmalarına əsasən ərazidə reintroduksiya olunmuş fərdlərdən əlavə, 2011-ci ildə dünyaya gəlmiş 7-10 sayda ceyran balası da müşahidə edilib. Eyni zamanda ceyranların bir il ərzində Samux və Şəki rayonlarının ərazisində də hərəkəti qeydə alınıb.

ETSN