Sosial

Ana səhifə

Sosial

Azərbaycanda akkreditasiyadan keçə bilməyən ümumtəhsil məktəblərinin statusu aşağı salına bilər

27 dekabr 2011 09:44 (UTC +04:00)

Bakı. Sevil Zeynalqızı - APA. “Azərbaycanda akkreditasiyadan keçə bilməyən ümumtəhsil məktəblərinə Akkreditasiya Komissiyanın göstərdiyi qüsurları aradan qaldırmaq üçün bir il vaxt veriləcək. Bir ildən sonra həmin məktəb yenidən akkreditasiya olunacaq. Nöqsanlar təkrarlandıqda isə akkreditasiya qaydalarında göstərilmiş tələblərə uyğun olaraq həmin məktəb haqqında tədbir görüləcək. Belə məktəblərin statusu aşağı salına bilər”. Bunu APA-ya açıqlamasında Təhsil Nazirliyinin Akkreditasiya şöbəsinin müdiri Həbib Zərbəliyev deyib.

Onun sözlərinə görə, statusu aşağı salınan məktəbə başqa status verilə bilər: “Tutaq ki, həmin məktəb gimnaziyadırsa, topladığı ballara əsasən ona tam orta məktəb və ya orta məktəb statusu müəyyənləşdirilə bilər”.

H. Zərbəliyev akkreditasiyadan keçə bilməyən orta məktəblərin bağlanılmasının daha sərt addım olduğunu deyib: “Orta məktəblərin akkreditasiyasının məqsədi bu məktəblərin bağlanması deyil, təhsilin keyfiyyətinin yüksəldilməsinə nail olmaqdır. Məktəbin bağlanılması son addımdır. Amma inanmıram ki, indi elə bir ümumtəhsil müəssisəsi olsun ki, heç bir standartlara cavab verməsin, heç olmasa minimal göstəricilərə malik olmasın”.

Şöbə müdirinin sözlərinə görə, təhsil müəssisələrinin akkreditasiyası təhsil prosesinin təşkilini, məktəbin maddi-texniki bazasının, təhsil proqramlarının, kadr potensialının, maliyyə resurslarının və təhsil infrastrukturunun qəbul olunmuş dövlət təhsil standartlarına və digər normativ hüquqi aktların tələblərinə uyğunluğunun müəyyən edilməsi məqsədilə aparılır: “Təhsil müəssisəsinin akkreditasiyası təhsil müəssisəsinin statusunun müəyyən edilməsi, onun fəaliyyətinin növbəti beş il müddətinə uzadılması üçün hüquqi təminatdır”.

Qeyd edək ki, Azərbaycanda ümumtəhsil məktəblərinin akkreditasiyasına dekabr ayında başlanılıb. Artıq Gəncə şəhər 27 saylı fizika-riyaziyyat və informatika təmayüllü məktəb-liseyin akkreditasiya edilib və nəticələr yaxın vaxtlarda açıqlanacaq. Bundan sonra isə Şirvan şəhər 16 saylı, Bakı şəhər 225 saylı tam orta məktəblər, Sumqayıt şəhər Təbiət fənləri təmayüllü gimnaziya, Bakı şəhər 164 saylı, Mingəçevir şəhər 10 saylı, Ağdaş rayon 1 saylı, Lənkəran rayon 4 və 6 saylı, Şəki şəhər 3 saylı, Quba rayon 2 saylı tam orta məktəblərin akkreditasiyası həyata keçiriləcək.

akkreditasiya