Sosial

Ana səhifə

Sosial

Şahdağ turizm kompleksinin tikilməsi ilə əlaqədar evləri tikinti sahəsinə düşən sakinlər üçün yeni yaşayış evləri inşa olunub

11 yanvar 2012 08:05 (UTC +04:00)

Qusar. Vəli Turan – APA. Azərbaycanın Qusar rayonunda Şahdağ qış-yay turizm kompleksinin tikilməsi ilə əlaqədar olaraq evləri tikinti sahəsinə düşən Kuzun kənd sakinləri üçün yeni yaşayış evləri tikilib. Qusar rayonunda inşa olunan Şahdağ qış-yay turizm kompleksinin ərazisinə düşən 24 yaşayış evi isə sökülüb. Bu barədə APA-nın şimal bürosuna Kuzun kənd bələdiyyəsinin sədri, Rafiq Dostəliyev məlumat verib. Onun sözlərinə görə, həmin yaşayış evləri turizm kompleksinin ərazisində inşa olunub: “Bu yaşayış evlərinin əksəriyyəti qanunsuz tikilmişdi. Buna baxmayaraq, Kuzun kəndinin ərazisində evi sökülən 24 vətəndaş üçün yeni müasir standartlara cavab verən evlər tikilib. Artıq 18 ailə həmin evlərə köçürülüb. Digər 6 ailə isə yaxın zamanlarda köçürüləcək”.

Qeyd edək ki, kompleksin tikintisinə 2009-cu ilin sentyabrında başlanıb. Bu kompleks Qusar rayon mərkəzindən 32 kilometr məsafədə yerləşir. Kompleksin ümumi ərazisi 2058 hektardır. Tikinti aparılan ərazi Şahdağ Milli Parkının ərazisində yerləşir. Kompleks dəniz səviyyəsindən 1300-2351 metr hündürlükdədir.

Şahdağ _ turizm kompleksi