Sosial

Ana səhifə

Sosial

"Giriş-çıxış və qeydiyyat" idarələrarası avtomatlaşdırılmış məlumat-axtarış sisteminin istismarının təşkili qaydaları təsdiqlənib

16 yanvar 2012 10:40 (UTC +04:00)

Bakı. Rəşad Süleymanov - APA. Nazirlər Kabineti "Giriş-çıxış və qeydiyyat" idarələrarası avtomatlaşdırılmış məlumat-axtarış sisteminin (İAMAS) istismarının təşkili Qaydaları"nı və "Giriş-çıxış və qeydiyyat" idarələrarası avtomatlaşdırılmış məlumat-axtarış sistemi daxilində dövlət orqanlarının informasiya resurslarından istifadəyə buraxılış dərəcəsi"ni təsdiq edib. Bu barədə APA-ya Nazirlər Kabinetindən məlumat verilib. Sənəddə İAMAS-ın fəaliyyətini əlaqələndirən qurumlar müəyyənləşdirilib.

İAMAS-la şəxsiyyəti təsdiq edən sənədlərin verilməsi də sənəddə əksini tapıb. Belə ki, proses çərçivəsində vətəndaşın üz təsvirinin və qanunvericiliklə müəyyən edilən digər biometrik məlumatlarının əldə olunması İAMAS-ın stasionar və ya mobil skanerləri ilə həyata keçirilərək "Azərbaycan Respublikasının vətəndaşları" informasiya resursuna daxil ediləcək.

Ümumvətəndaş pasportunu dolduran regional mərkəzdə şəxs biometrik məlumatlar əsasında identifikasiya olunacaq, pasportu ilk dəfə aldığı və ya dəyişdirdiyi, pasport almaq üçün təqdim etdiyi fərdi məlumatların və fərdi identifikasiya nömrəsinin düzgünlüyü və tamlığı bu məlumatların saxlandığı İAMAS-ın "Azərbaycan Respublikasının vətəndaşları" və "Sərhədkeçmə" informasiya resurslarında və İAMAS-la qarşılıqlı inteqrasiya olunmuş Əhalinin Dövlət Reyestrindən, İAMAS-a qoşulmuş "Elektron sağlamlıq kartı" sistemindən və digər müvafiq informasiya sistemlərində avtomatik qaydada yoxlanılacaq. Pasport verilərkən qanunvericiliklə müəyyən edilmiş məhdudiyyət hallarının mövcudluğu avtomatik olaraq "Sərhədkeçməyə məhdudiyyət siyahısı" informasiya resursundan yoxlanışı həyata keçiriləcək.

İAMAS vasitəsilə əcnəbilərə və vətəndaşlığı olmayan şəxslərə vizaların verilməsi də mümkün olacaq. Bu zaman sistemə daxil edilmiş məlumatlar əsasında Xarici İşlər Nazirliyində və Milli Təhlükəsizlik Nazirliyində müvafiq yoxlamalar həyata keçiriləcək və yoxlamaların nəticəsindən asılı olaraq əcnəbilərə müvafiq vizalar veriləcək.