Sosial

Ana səhifə

Sosial

İsmayıllıda 20 Yanvar əlilləri və şəhid ailələrinin sosial müdafiəsi ilə bağlı zona müşavirəsi keçirilib

18 yanvar 2012 09:42 (UTC +04:00)

Bakı - APA-Economics. Bu gün İsmayıllı rayonunda əmək və əhalinin sosial müdafiəsi naziri Fizuli Ələkbərovun sədrliyi ilə nazirliyin aztəminatlı vətəndaşların rifah halının yüksəldilməsi, həmçinin 20 Yanvar əlilləri və şəhid ailələrinin sosial müdafiəsinin gücləndirilməsi sahəsində görülən işlərin və qarşıda duran vəzifələrin müzakirəsinə həsr olunmuş zona müşavirəsi keçirilib.

Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən “APA-Economics”ə verilən məlumata görə, nazir Fizuli Ələkbərov bildirib ki, hazırda Azərbaycanda sosial proqramların icrası işləri uğurla davam etdirilir, ünvanlı sosial yardım alan ailələrin sayı 120 min, hər bir ailəyə düşən yardımın orta aylıq məbləği 106 manat təşkil edir.

Ötən il aztəminatlı ailələrin öz potensial imkanlarından istifadə etməklə gəlirlərini artırmalarına şərait yaradılması üçün Birdəfəlik sosial yardım - “Özünədəstək” proqramı hazırlanıb. Ölkə rəhbərinin sərhədyanı bölgələrin əhalisinə göstərdiyi diqqət və qayğıya uyğun olaraq ötən ilin martında Tovuz rayonunun Ermənistanla həmsərhəd Vahidli kəndində sınaq işlərinə başlanılan bu layihənin cari ildən bütün ölkədə icrası planlaşdırılır. Proqramda iştirak edən ailə artıq ünvanlı yardım almayacaq və sosial reabilitasiya olunaraq yoxsulluq həddindən çıxacaq.

Eyni zamanda ötən il vətəndaşlarına xidmətin keyfiyyətcə yüksəldilməsi, onlara dövlət təminatlarından yararlanmaq məqsədilə alternativ müraciət imkanlarının yaradılması, həmçinin ünvanlı yardımların təyinatı işində şəffaflığın artırılması, bu sahədə məmur-vətəndaş münasibətlərinin minimuma endirilməsi, qərar qəbul etmə prosesində subyektiv amillərin aradan qaldırılması məqsədilə ünvanlı sosial yardım üçün alternativ müraciət mexanizmlərinin tətbiqinə başlanıb. İlkin olaraq pilot layihə kimi Cəlilabad və Balakən rayonlarında sınaqdan keçirilməsinə başlanılan bu sistem cari ildə digər rayon və şəhərlərdə də tətbiq olunacaq.

Azərbaycan Prezidentinin 23 may 2011 tarixli “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” fərmanının icrası olaraq, nazirlik tərəfindən əhaliyə göstəriləcək elektron xidmətlərin təşkili istiqamətində müəyyən işlər görülüb, nazirliyin fəaliyyət istiqamətləri üzrə təşkil edilməsi nəzərdə tutulan elektron xidmət növlərinin siyahısı müəyyənləşdirilib. Görülən işlərdə şəffaflığın artırılması məqsədilə ötən il nazirlikdə vətəndaş cəmiyyətlərinin təmsil olunduğu İctimai Şura yaradılıb. Nazir və nazirliyin digər rəhbər şəxsləri tərəfindən müxtəlif şəhər və rayonlarında ümumilikdə 560 nəfərdən artıq vətəndaş qəbul edilərək, onların müraciətləri yerində araşdırılıb, İctimai Şuranın üzvlərinin fəal iştirakı ilə konkret tədbirlər görülüb.

Tədbirdə 20 Yanvar faciəsinin 22-ci ildönümünün yaxınlaşdığını qeyd edən nazir Fizuli Ələkbərov bildirib ki, bununla əlaqədar nazirlik tərəfindən 127 şəhid ailəsinin və 328 nəfər əlilin hər birinə 50 manat məbləğində birdəfəlik maddi yardım göstərilməsi məqsədilə vəsait ayrılıb. «20 Yanvar şəhidinin ailəsi üçün Azərbaycan Respublikası Prezidentinin təqaüdünün təsis edilməsi haqqında» prezidentin 2006-cı il 19 yanvar tarixli fərmanı ilə «20 Yanvar şəhidi» fəxri adı almış şəxslərin ailə üzvlərinə ayda 300 manat məbləğində Prezident təqaüdü təyin olunub. Eyni zamanda 1990-cı ilin 20 Yanvar hadisələri ilə əlaqədar I qrup əlillərə 150 manat, II qrup əlillərə 130 manat, III qrup əlillərə 100 manat məbləğində Azərbaycan prezidentinin aylıq təqaüdü təsis edilib.

Əmək və Əhalinin Sosial Müdafiəsi Nazirliyi indiyədək 51 nəfər şəhid ailəsi və 20 Yanvar əlili mənzillə, 50 nəfər əlili isə minik avtomaşını ilə təmin edib. Bununla yanaşı, 7 nəfər 20 Yanvar əlilinin respublikadan kənarda və respublika daxilində müalicəsinə müvafiq köməklik göstərilib, həmçinin nazirlikdə fəaliyyət göstərən komissiyanın qərarı ilə 85 nəfər 20 Yanvar əlilinə birdəfəlik maddi yardım verilib. Son üç ildə bu təbəqədən olan 25 nəfər əlil vətəndaşın yay mövsümündə Nabran istirahət zonasında dövlət hesabına istirahəti təşkil edilib.

Tədbir çərçivəsində əlil ictimai birliklərinin rəhbərləri ilə nazirliyin məsul şəxsləri arasında görüş keçirilib. Görüşdə əlillər, o cümlədən 20 Yanvar əlilləri və şəhid ailələri ilə bağlı görülən işlər və bu sahədə qarşıda duran vəzifələr barədə fikir mübadiləsi aparılıb.