Sosial

Ana səhifə

Sosial

Ekologiya və Təbii Sərvətlər Nazirliyi: Yağışların miqdarının artması və qar ərimələri sürüşmə zonalarında müəyyən aktivləşmələrə səbəb olacaq

24 fevral 2012 11:19 (UTC +04:00)

Bakı. Sevil Zeynalqızı-APA. “Yağışların miqdarının artması və qar ərimələri sürüşmə zonalarında müəyyən aktivləşmələrə səbəb olacaq. Yerüstü suların sürüşməyə meylli sahələrdə özünü büruzə verməsi sürüşmələri aktivləşdirəcək”. Bu barədə APA-ya Ekologiya və Təbii Sərvətlər Nazirliyinin (ETSN) Kompleks Hidrogeologiya və Mühəndis Geologiyası Ekspedisiyasının baş mühəndisi Şaiq Niftiyev bildirib. Onun sözlərinə görə, qar ərimiş sahələrdə müşahidələr aparılıb: “Belə ərazilərin çoxu qar örtüyünün altındadır. Ona görə də həmin yerlərdə vəziyyəti müəyyənləşdirmək mümkün olmayıb”.

Ş, Niftiyev deyib ki, Tovuz rayonunun Girzan qəsəbəsində Ceyrançöl otlaq sahələrinə gedən ərazilərdə ikinci sürüşmə müşahidə olunub: “Birinci sürüşmə fevralın 10-da, ikinci sürüşmə isə fevralın 16-da baş verib. Sürüşmə infrastruktura ziyan vurub. Otlaqlara gedən yol Tovuz rayonu ərazisində Ceyrançöl qışlağına gedən yeganə yoldur. Yol tamamilə bağlanıb. Onu bərpa etmək mümkün deyil. Biz Nazirlər Kabinetinə təkliflərimizi verdik, oraya başqa bir istiqamətdən yol çəkilməlidir. Hazırda bunun üçün layihələr hazırlanır”.

Baş mühəndisin sözlərinə görə, Astara rayonu ərazisində 3 yerdə lokal sürüşmələr müşahidə olunub. Bunlar təpə sürüşmələridir. Ş. Niftiyev Lerik-Lənkəran yolu boyunca sürüşmələrdə aktivləşmələrin müşahidə olunduğunu deyib: “Lerikin üç kəndində sürüşmələrdə aktivləşmələr var və hazırda mütəxəssislərimiz orada işləyirlər”.

Şamaxı, İsmayıllı zonalarında olan sürüşmə sahələri qar örtüyü altında olduğuna görə orada müşahidələr aparmaq mümkün olmayıb. Yardımlının Pinəvad kəndində iki gün əvvəl aparılan müşahidələr nəticəsində köhnə sürüşmə sahəsinin daxilində yeni bir lokal sürüşmələrin yarandığı məlum olub: “Bu sürüşmələr qar ərimələri ilə bağlıdır. Aktivləşmələrin müşahidə olunduğu sürüşmə zonaları lokal sahələrdə olduğuna görə, yaşayış sahələri və böyük kommunikasiya xətlərinə heç bir təsiri olmayacaq”.

sürüşmə