Sosial

Ana səhifə

Sosial

Qanunsuz ov hallarının qarşısını almaq məqsədilə reydlər keçirilib

24 fevral 2012 15:08 (UTC +04:00)

Bakı. Sevil Zeynalqızı - APA. Ekologiya və Təbii Sərvətlər Nazirliyinin aidiyyəti qurumlarının əməkdaşları tərəfindən respublika ərazisində çöl quşlarının və heyvanların qanunsuz ovlanması və satılması hallarının qarşısını almaq məqsədilə reydlər keçirilib. Nazirliyin mətbuat xidmətindən APA-ya verilən məlumata görə, bu il yanvar-fevral aylarında keçirilən reydlər zamanı qanunsuz ovla məşğul olan 85 nəfər saxlanılıb, onlardan 73 ədəd ov tüfəngi, 233 ədəd patron, 164 ədəd quş, o cümlədən “Qırmızı kitab”a düşmüş fısıldayan qu, bəzgək quşları götürülüb. Faktlarla bağlı 55 nəfər barəsində protokol tərtib olunub, onlardan 24 nəfər inzibati qaydada ümumilikdə 24000 manat məbləğində cərimə edilib, 31 nəfərin işinə qanuna müvafiq qaydada baxılır. 30 nəfərin isə şəxsiyyətinin müəyyənləşdirilməsi üçün hüquq-mühafizə orqanlarına müraciət olunub.

Məlumatda bildirilir ki, reydlər zamanı qanun pozucuları tərəfindən şəxsiyyətlərini təsdiq edən və ov silahlarına dair sənədlərin təqdim edilməməsi, nazirliyin əməkdaşlarına müqavimət göstərilməsi, fiziki zərər vurulması halları da olub. Nazirliyin 7 saylı Ərazi Ekologiya və Təbii Sərvətlər Şöbəsinin əməkdaşlarının keçirdiyi növbəti reyd zamanı Sabirabad, Saatlı və İmişli rayonlarının ərazisində fəaliyyət göstərən Sarı-su Ovçuluq Təsərrüfatının ərazisində qanunsuz ovla məşğul olan 3 nəfər Saatlı rayonunun Hacıqasımlı kənd sakinləri saxlanılıb. Şöbə əməkdaşları qanun pozucularından şəxsiyyətlərinin təsdiqinə və ov silahına dair sənəd tələb etdiyi zaman həmin şəxslərdən biri şöbənin əməkdaşı Kərim Səlimova müqavimət göstərib, ov silahı ilə onun üz nahiyəsinə zərbə endirərək yaralayıb və qaçıblar. Saxlanılan bir nəfərdən 1 ədəd ov tüfəngi, 17 ədəd patron, 5 ədəd “Qırmızı Kitaba” düşmüş fısıldayan Qu quşu aşkar edilib və İnzibati Xətalar Məcəlləsinin 404-cü maddəsinə əsasən maddi-sübut kimi götürülüb. Faktla bağlı qanuna müvafiq qaydada akt və protokol tərtib edilib.

Qeyd olunan qanun pozuntusu və nazirliyin əməkdaşına vurulan fiziki zərər barəsində Saatlı rayon Polis Şöbəsinə məlumat verilib. Faktla bağlı toplanmış materiallar İmişli Rayon Prokurorluğuna təqdim olunması üçün hazırlanır.

qanunsuz ov