Bakı – APA. Heydər Əliyev Fondunun təşkilatçılığı ilə VII “Qız qalası” Beynəlxalq incəsənət festivalı çərçivəsində Bakıda “Daşın nəğməsi” (Music in Stone) I Beynəlxalq heykəltəraşlıq simpoziumu başlayıb.
Fonddan APA-ya verilən məlumata görə, simpoziumda Azərbaycan, İspaniya, Macarıstan, Almaniya, ABŞ, Bolqarıstan, Meksika, Hindistan, Gürcüstan və Makedoniyadan 14 heykəltəraş iştirak edir.
Simpoziumun davam etdiyi müddətdə iştirakçılar yerli təbii daşlardan (Şəmkir qumdaşı, Abşeron əhəngdaşı) müxtəlif əsərlər yaradacaqlar. Heykəltəraşlar Bakının Qala qəsəbəsində açıq səma altında çalışırlar.
Macarıstandan olan tanınmış heykəltəraş Bita Rostas (Beata Rostas) Azərbaycan təbii daşlarının incəsənət nümunələri yaradılması üçün çox münasib olduğunu bildirib: “Bizə təqdim olunan daş növləri ilə işləmək çox rahatdır. Əminəm ki, biz öz düşüncələrimizi, yaradıcı fikirlərimizi bu materiallarda tam ifadə edə biləcəyik”.
Heykəltəraşlar üçün mövzu məhdudiyyəti yoxdur, onlara tam özünüifadə imkanı verilib. Sənət adamları məhəbbət, həyat eşqi və digər mövzularda işləyir.
Gürcüstanın Dövlət Mükafatı laureatı Genadi Zakaraia əsərində Şərq ornamentlərindən istifadəyə qərar verib: “Bakının arxitekturası məni heyran etdi. Qədimliklə müasirlik şəhərin memarlığında çox gözəl sintez olunub. Mən Azərbaycana dəvət olunan an yaradacağım əsərdə daha çox Şərq koloritinə üstünlük verəcəyimə qərar verdim”.
Oktyabrın 2-dək davam edəcək simpozium çərçivəsində yaradılan işlər Bakı şəhərinin parklarından birində sərgilənəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
