Daxili siyasət

Ana səhifə

Daxili siyasət

ASDP Ayaz Mütəllibovun Azərbaycana qayıtmasına şərait yaradılması xahişi ilə prezident İlham Əliyevə müraciət edib

21 oktyabr 2008 14:41 (UTC +04:00)

Bakı. Ramil Məmmədli-APA. Azərbaycan Sosial Demokrat Partiyasının (ASDP) Mərkəzi Komitəsinin Plenumu partiyanın həmsədri Ayaz Mütəllibovun Azərbaycana dönməsinə şərait yaradılması ilə bağlı dövlət başçısı İlham Əliyevə müraciət edib. ASDP mətbuat xidmətindən APA-ya verilən məlumata görə, müraciətdə A. Mütəllibovun 1992-ci ildə hakimiyyətə gələn AXC-nin təzyiqi ilə mühacirətə getməsinə diqqət yönəldilib: “Həmin il AXC iqtidarının göstərişi ilə Ayaz Mütəllibova qarşı qondarma cinayət işi açılıb. O zamandan artıq 16 il ötüb. Lakin Azərbaycanın ilk prezidenti və 2003-cü ildən Azərbaycan Sosial Demokrat Partiyasının həmsədri olan Ayaz Mütəllibov hələ də vətənə dönüb yaşamaq və fəaliyyət göstərmək imkanından məhrumdur”. Müraciətdə İ. Əliyevin cəmiyyətin təmərküzləşməsi istiqamətində atdığı addımlar da təqdir edilib: “Ümid edirik ki, tez bir zamanda Azərbaycan prezidenti ölkə Konstitusiyasının qarantı olaraq, Ayaz Mütəllibovun da hüquqlarını müdafiə edərək, onun Azərbaycana qayıdışının və toxunulmazlığının təminatçısı olacaqsınız”. Partiyanın mətbuat xidmətindən APA-ya göndərilən məktubda isə İ. Əliyev prezident seçilməsi münasibətilə təbrik edilib: “Azərbaycanın ilk siyasi partiyasında birləşən sosial-demokratlar sizin prezidentliyiniz dövründə Azərbaycan xalqının rifahı, dövlətimizin möhkəmlənməsi yolunda real fəaliyyətinizi həmişə müdafiə etməyə hazırdır. ASDP sizin yürütdüyünüz xarici siyasəti də tam bəyənir”.