Diaspor

Ana səhifə

Diaspor

ABŞ-da baş verən zəlzələdə azərbaycanlılar zərər çəkməyib

25 avqust 2011 08:59 (UTC +04:00)

APA-nın Vaşinqton müxbirinin verdiyi məlumata görə, Şimali Karolinadan Bostona qədər ərazidə hiss olunan zəlzələnin episentri Virciniya ştatının Riçmond şəhərinə düşüb.

Azərbaycan diasporundan APA-nın Vaşinqton müxbirinə bildiriblər ki, azərbaycanlılardan heç birinin evinə ziyan dəyməyib.

“Zəlzələ baş verəndə mən 19-cu mərtəbədə ofisdə idim. Biz zəlzələni əməlli-başlı hiss etdik, amma heç kim təlaşlanmadı və biz təhlükəsizlik xidmətinin əməkdaşlarının müşayiəti ilə binanı tərk etdik”. Bu sözlər Nyu-Yorkda yaşayan həmyerlimiz Anar Kazımova məxsusdur.

“Hamı telefon vasitəsilə qohumları ilə əlaqə saxlamaq istəyirdi, amma ya telefon stansiyaları zərər çəkdiyinə, ya da yükləndiyinə görə biz öz dostlarımız və qohumlarımızla əlaqə saxlaya bilmirdik”. Bu açıqlamanı APA-ya Merilenddə yaşayan Rüfət Həmidov verib. Onun sözlərinə görə, bu zəlzələ ona on il əvvəl Bakıda baş vermiş zəlzələni xatırladıb: “Məncə, bu da həmin zəlzələ gücündə idi, amma biz onu daha çox hiss etdik, yəqin binaların tikilişi fərqli olduğu üçün belə olub”.

Azərbaycan diasporunun digər bir üzvü, Vaşinqtonda yaşayan Qərib Fərhadov deyir ki, zəlzələ baş verəndə gözlərinə inanmayıb: “Mən burada 30 ildən çoxdur ki yaşayıram.
Valideynlərim illər öncə bura köçüblər və biz heç vaxt zəlzələ barədə eşitməmişik”.

Qeyd edək ki, avqustun 23-də ABŞ-ın Virciniya ştatında 5,9 bal gücündə zəlzələ baş verib. Yeraltı təkanların güclü olması səbəbilə mühüm dövlət strukturlarının yerləşdiyi binalarda, o cümlədən Konqres və Pentaqonda evakuasiya aparılıb. Nyu-Yorkdakı Con Kennedi aeroportu zəlzələyə görə işini dayandırıb, dispetçer qüllələrindəki əməkdaşlar evakuasiya olunublar. Aeroport fəaliyyətini bir neçə saat sonra bərpa edib.