Diaspor

Diaspor

Almaniyadakı azərbaycanlıların ermənilərin planlaşdırdığı “20 il Dağlıq Qarabağ Respublikası” adlı konsertə qarşı etiraz dalğası güclənir

25 avqust 2011 15:00 (UTC +04:00)

Bakı - APA. Almaniyadakı Azərbaycanlıların Koordinasiya Mərkəzi 2011-ci il sentyabrın 16-dan 22-nə bu ölkədə keçiriləcək Ermənistan Mədəniyyət Günləri çərçivəsində nəzərdə tutulan “20 il Dağlıq Qarabağ Respublikası” adlı konsert proqramına qarşı yazılı etiraz aksiyası təşkil edib. Diasporla İş üzrə Dövlət Komitəsindən APA-ya verilən xəbərə görə, yazılı etiraz aksiyasına Almaniyada fəaliyyət göstərən bir sıra cəmiyyətlər, o cümlədən Avropa Azərbaycanlıları Konqresi, Azərbaycan Diasporunun Almaniyadakı Mərkəzi Şurası, Hannover şəhərində fəaliyyət göstərən “Xəzər” Cəmiyyəti, Maqdeburq şəhərində fəaliyyət göstərən Saksen-Anhalt vilayəti üzrə Alman-Azərbaycan Dostluq Cəmiyyəti, Drezden şəhərində fəaliyyət göstərən ALM.AZ cəmiyyəti, Berlin-Bakı Qalereyası, Almaniyadakı Türk-Azərbaycan Birliyi, Almaniya-Azərbaycan Dostluq Cəmiyyəti qoşulublar.

Baden-Vürtemberq əyalətinin hökumət rəhbərliyinə və Ştutqart şəhərinin baş bələdiyyə rəisinə açıq etiraz məktubları göndərilib. Məktubu həmyerlilərimizlə yanaşı, yəhudi və alman icmalarının nümayəndələri də imzalayıblar.