Diaspor

Ana səhifə

Diaspor

Əli Həsənov: “Cənubi Qafqaz xalqları bir yerdə, sülh şəraitində yaşamağa, bir-birinə dəstək verməyə məhkumdurlar”

28 avqust 2011 15:52 (UTC +04:00)

APA-nın Gürcüstan bürosunun məlumatına görə, Ə. Həsənov çıxışında Azərbaycan dövlətinin öz inkişafı ilə yanaşı, Gürcüstanın taleyi ilə də xoş niyyətlə maraqlandığını bildirib: “Azərbaycan Gürcüstanda yaşayan azərbaycanlıların durumu, eyni zamanda bütün vətəndaşlarının firavan həyatı ilə maraqlanır, dövlətlərimiz arasında münasibətlərin inkişafı qayğısına qalır. Şübhəsiz ki, hər bir dövlət, hər bir xalq müstəqilliyi ilə bağlı siyasətini planlaşdırarkən öz xalqının, dövlətinin maraqlarını önə çəkir, onun inkişaf prinsiplərini, inkişaf resurslarını müəyyən edir, əsas məqsəd və məramları müəyyənləşdirib onu həyata keçirir”.

Ə. Həsənov çıxışında hər bir ölkənin ilk növbədə öz xalqının maddi-mənəvi maraqlarının təminatı, iqtisadi-siyasi sosial təhlükəsizliyi məsələləri düşündüyünü deyib: “Hər bir dövlət özünün geosiyasi əhatəsini, malik olduğu resursların istifadəsi taktikasını müəyyən etmədən, yaşadığı coğrafiyanın reallığını nəzərə almadan heç zaman fərdi qaydada, təcrid olunmuş şəkildə inkişaf edə bilməz.”

Ə. Həsənov Cənubi Qafqazda yaşayan xalqların bir yerdə, eyni coğrafi məkanda yaşamağa məhkum olunduğunu bildirib: “Cənubi Qafqazın geosiyasi reallıqları elədir ki, burada məskunlaşmış xalqlar hansı əqidəyə, maraq və məqsədə, mənəviyyata xidmət etməsindən asılı olmayaraq, bir yerdə, sülh şəraitində yaşamağa, bir-birinə dəstək verməyə məhkumdurlar. Cənubi Qafqazın tarixində həmişə belə olub, gələcəkdə də belə olacaq.”

Şöbə müdiri çıxışında Cənubi Qafqaz ölkələrinin yadelli işğalçılara qarşı birgə vuruşduğunu bildirib: “Rusiya imperiyası dağıldıqdan sonra Cənubi Qafqazda müstəqil dövlətlərin yaranması da bir-biri ilə əlaqəli şəkildə baş verib. Azərbaycan xalqı humanistlik və geniş ürəklilik edərək özünün qədim xanlığı olan İrəvan xanlığını ermənilərə verib. Cənubi Qafqazda belə nümunələr çoxdur. Azərbaycanlılar gürcülərə, gürcülər də azərbaycanlılara qarşı da çoxlu humanist addımlar atıblar. Təəssüflər olsun ki, müəyyən məqamlarda bir-birinə güzəştə getməmək halları da olub və inkişafa əngəl yaranıb”.

Ə. Həsənov inkişafa mane olan amillərdən birinin Dağlıq Qarabağ münaqişəsi olduğunu deyib: “Dağlıq Qarabağ, Abxaziya, Cənubi Osetiya münaqişələri, oradakı etnik separatizmlər... Bunlar Cənub Qafqaz xalqları arasına nifaq salan, münaqişə törədən nümunələrdir”.

O, Azərbaycanın Cənubi Qafqazın iqtisadi-siyasi, sosial və ümumi geosiyasi ərazisində həmişə önəmli yerlərdən birini tutduğunu deyib: “Azərbaycan Cənubi Qafqazın ən böyük dövlətidir. Həm ərazisinə, həm əhalisinin sayına, həm iqtisadi ehtiyatlarına, həm də bütövlükdə bölgədəki təbii , coğrafi qaynaqlarına və geosiyasi üstünlüklərinə görə... Bu gün Cənubi Qafqazda orta hesabla 50 milyard dollar məbləğində ümumi daxili məhsul istehsal edən yeganə ölkə Azərbaycandır. Adambaşına düşən gəlirə görə də Azərbaycan Cənubi Qafqazda ön yerdədir. Cənubi Qafqazın ümumi iqtisadi resurslarının 70 faizi təxminən Azərbaycandadır. Eyni zamanda Azərbaycan Cənubi Qafqazda bütün enerji, neft, təbii qaz və digər qaynaqlarla ən zəngin ölkədir. Azərbaycan ildə təqribən 40 milyon ton neft, 30 milyard kubmetr təbii qaz istehsalı tempini davam etdirsə, onun orta hesabla 30-50 ilə çatacaq neft, 100-120 ilə çatacaq təbii qaz ehtiyatı var. Təsəvvür edin ki, neft və qazdan gələn gəliri 30-35 milyard dollar dəyərində olduğundan bunu 100 ilə vuranda hansı məbləğdə sərmayə edir və bu sərmayə yalnız Azərbaycan deyil, bütün Cənubi Qafqaz əhalisinin İsveçrə əhalisinin səviyyəsində yaşamasına bəhs edəcək qədərdir”.

Ə. Həsənov Gürcüstanın dar məqamlarında Azərbaycanın ona əl atıb, kömək etdiyini vurğulayıb: “Azərbaycanın da dar günündə Gürcüstan ona əl atıb. Bizim dövlətlər dünyanın ən kiçik ölkələri olsa da, geostrateji, geosiyasi və geoiqtisadi mövqelərinə görə ən əhəmiyyətli dövlətlərindən hesab olunur”.