Diaspor

Ana səhifə

Diaspor

Qənirə Paşayeva: “Bizi təkcə neft kəmərləri deyil, Gürcüstanda yaşayan azərbaycanlılar və Azərbaycanda yaşayan gürcülər birləşdirir”

29 avqust 2011 18:52 (UTC +04:00)

Batumi. Nizami Məmmədzadə - APA. “Gürcüstan prezidenti azərbaycanlılarla bağlı məsələlərə çox həssaslıqla yanaşır”. APA-nın Gürcüstan bürosunun məlumatına görə, bu barədə Azərbaycan-Gürcüstan parlamentlərarası dostluq qrupunun rəhbəri Qənirə Paşayeva bildirib. O, hər iki dövlətin keçdiyi yolun eyni olduğunu deyib: “Bizi keçmişimiz, gələcəyimiz bağlayır. Azərbaycan hər zaman Gürcüstanın yanında olduğunu bəyan edib. Azərbaycanın ümummilli liderinin hakimiyyətə gəlişindən sonra yeni mərhələnin başlanğıcı elan olundu. Milli liderin arzusu o idi ki, Azərbaycanın həyata keçirdiyi böyük layihələrdə Gürcüstan da iştirak etsin, Azərbaycanla birlikdə inkişaf yolu keçsin. Bu gün Azərbaycan və Gürcüstan dost, qardaş olmaqla yanaşı, həm ciddi müttəfiqdirlər.”

Q. Paşayeva Gürcüstandan çox böyük layihələrin keçdiyini, bu layihələrin Avropaya qədər uzanacağını deyib: “Biz Avropanı Asiya ilə birləşdirəcək dəmiryolu layihəsini gələn il gerçəkləşdirəcəyik. Bu layihələri prezidentimiz həyata keçirir, Gürcüstan prezidenti də buna dəstək verir”.

Millət vəkili Gürcüstanda Azərbaycan şirkətlərinin önəmli rol oynadığını bildirib: “Bu gün Gürcüstanda Azərbaycan şirkətləri önəmli rol oynayırlar. Bu şirkətlər Gürcüstanda ən yaxşı vergi ödəyicisidirlər. Bizi təkcə neft kəmərləri deyil, Gürcüstanda yaşayan azərbaycanlılar və Azərbaycanda yaşayan gürcülər birləşdirir. Təbii ki, həm Azərbaycan, həm də Gürcüstan öz siyasətlərində bu tellərin incəliyini nəzərə alır ki, başqa güclər bu münasibətlərdən istifadə etməsinlər. Biz hansısa qüvvələrin bu münasibətlərə xələl gətirməsini önləməliyik. Azərbaycanın inkişafı Gürcüstanın inkişafı, Gürcüstanın inkişafı Azərbaycanın inkişafıdır. Azərbaycan və Gürcüstan eyni zamanda xarici təşkilatlar çərçivəsində də bir-birini dəstəkləyir. Mən inanıram ki, Batumiyə toplaşan bütün insanlar bu birliyə dəstək olacaqlar”.

Q. Paşayeva Gürcüstanın Müstəqillik günü münasibətilə Mixail Saakaşvilini də təbrik edib: “Biz bu gün müstəqilliyimizin bərpasının 20 illiyini Batumidə qeyd etdik. Arzum budur ki, gələn il Gürcüstanın müstəqilliyinin bərpasının 21 illiyini Abxaziyada və Osetiyada, Azərbaycanın müstəqilliyinin bərpasını isə Qarabağda qeyd edək”.