Diaspor

Ana səhifə

Diaspor

Azərbaycanın müstəqilliyinin 20 illiyi münasibətilə Batumidə keçirilən tədbirlər başa çatıb

29 avqust 2011 19:20 (UTC +04:00)

APA-nın Gürcüstan bürosunun məlumatına görə, dəyirmi masada çıxış edən Azərbaycanın Diasporla İş üzrə Dövlət Komitəsinin (DİDK) sədri Nazim İbrahimov bu tədbiri keçirməkdə məqsədin soydaşlarımızın Azərbaycan-Gürcüstan münasibətlərinin inkişafındakı rolunu müzakirə etmək və onların gürcü cəmiyyətinə inteqrasiyasında yaranan problemləri axtarmaq olduğunu deyib: “Bu məsələ hər iki dövlətin diqqətindədir. Bu istiqamətdə bir sıra məqsədyönlü tədbirlər həyata keçirilsə də, həlli vacib məsələlər hələ də qalır. Hesab edirəm ki, tədbirdə soydaşlarımızın problemlərini dinləyəcək və sonra təsirli qərarlar verə biləcəyik.”

Sonra tədbirdə Gürcüstanın reinteqrasiya məsələləri üzrə dövlət naziri Yekaterina Tkeşelaşvili çıxış edib: “Bu tədbir gözəl bir prosesin başlanğıcıdır. Səmimi şəkildə demək lazımdır ki, ölkəmizin dini-etnik cəhətdən fərqliliyi ölkələrimizin gücü deməkdir. Bu bizim köklü ağacın köklü budaqlarıdır. Bizim vətəndaşlar öz hüquqlarını realizə edirsə, bizim gücümüzdür. Ölkəmizin gücü bundadır. Fundamental təhsil almadan ölkə həyatında iştirak etmək mümkün deyil. Elə bir məktəb yaradılmalıdır ki, o milli-etnik mənsubiyyəti qorumalıdır. Məsələn, azərbaycanlılar öz ana dilini qorumalı, eyni zamanda gürcü dilini öyrənməyə çalışmalıdırlar. Lakin hələ bu yöndə çox iş görülməlidir”.

Dəyirmi masa ətrafında mövzu ətrafında çıxış edən Azərbaycanın Gürcüstandakı səfirliyinin müşaviri Şövqi Mehdizadə, Azərbaycanın Dini Qurumlarla İş üzrə Dövlət Komitəsinin sədr müavini Gündüz İsmayılov, Gürcüstan Milli Təhlükəsizlik Şurası katibinin müavini Tamar Kintsuraşvili, Dünya Azərbaycanlılarının Əlaqələndirmə Şurasının üzvü, Gürcüstan Azərbaycanlılarının Mədəniyyət Mərkəzinin sədri Fazil Həsənov, “Tolerans” İnsan Hüquqlarının Müdafiəsi İctimai Birliyinin sədri Elbrus Məmmədov Gürcüstan azərbaycanlılarının problemləri barədə fikir və mülahizələrini söyləyiblər.

Çıxışlardan sonra tədbir dialoq şəkilində davam etdirilib. Dialoqda “Gürcüstan mənim vətənimdir” İctimai Birliyinin sədri Əli Babayev, “Qeyrət” Xalq Hərəkatının üzvü Zümrüd Qurbanov, Kvemo-Kartli bölgəsinin qubernatoru David Kirkitadze və başqaları iştirak ediblər. Tədbirdə yekun sözü ilə Azərbaycan Prezident Administrasiyası İctimai-siyasi məsələlər şöbəsinin müdiri Əli Həsənov çıxış edib.

Tədbirdə Azərbaycanın və Gürcüstanın deputatları və rəsmi şəxslər iştirak ediblər.

Tədbirin sonunda “Gürcüstan azərbaycanlılarının cəmiyyətə inteqrasiyası Azərbaycan-Gürcüstan strateji tərəfdaşlığı kontekstində” dəyirmi masa iştirakçılarının bəyanatı və Azərbaycan və Gürcüstan prezidentlərinə müraciəti oxunub və qəbul edilib.

Əli Həsənov jurnalistlərə açıqlamasında avqustun 29-da keçirilən yekun toplantıda Gürcüstanda yaşayan soydaşlarımızın problemlərini müzakirə etdiklərini bildirib: “Onları narazı salan, onların Gürcüstan cəmiyyətinə inteqrasiyasını çətinləşdirən məsələlərə toxunduq. Bu məsələlər sırasında Gürcüstan azərbaycanlılarının dil problemi, Gürcüstan azərbaycanlılarının milli vətəndaş hüquqları, din, xarici qüvvələrin Gürcüstan azərbaycanlılarının içərisinə daxil olub, Gürcüstan və Azərbaycan hökuməti əleyhinə onlardan istifadə etmək cəhdləri və bunun qarşısının alınması, yer adları, Azərbaycan dilli məktəblərin vəziyyəti və onun aradan qaldırılması yolları, Gürcüstanda vahid vətəndaş və milli hüquqlar sahəsində vahid standartların müəyyən olunması və sair ətrafında fikir mübadiləsi aparıldı. Bu məsələlər təkcə burada yaşayan azərbaycanlıları deyil, eyni zamanda Gürcüstan hökumətinin rəsmilərini də müəyyən məqamda narahat edir. Gürcüstanda demokratik dövlət qurulur, Gürcüstan dünya hüquq normalarına əməl edir, konvensiyalara qoşulur, dini etiqad azadlığı, milli vətəndaş hüquqlarının təmin olunması-bunlar hamısı vahid beynəlxalq standartlara uyğun həyata keçiriləcək ki, azərbaycanlılar da Gürcüstanın vətəndaşları kimi bu hüquqlardan, milli hüquqlardan və digər hüquqlardan istifadə edəcəklər. Ona görə də düşünürəm ki, bugünkü toplantı çox səmərəli oldu. Gördüyünüz kimi, burada Gürcüstanın çox mühüm dövlət xadimləri iştirak edirdi. Reinteqrasiya naziri, Milli Təhlükəsizlik Şurası katibinin müavini, milli azlıqlar üzrə komissiyasının sədri, qubernator və tədbirə qatılan digər rəsmilər bilavasitə bu məsələləri tənzimləyib, bu məsələlərin həyata keçirilməsini təmin edirlər. Ona görə burada azərbaycanlıların problemləri açıq-aşkar ortaya qoyuldu, müzakirə olundu və qəbul elədiyimiz bəyanatda da əksini tapdı. Gürcüstan tərəfi də bu məsələlərə münasibətini açıq bildirdi ki, keçmiş hakimiyyətlər dövründə hansısa qüvvələr tərəfindən süni şəkildə yaradılmış problemlərin aradan qaldırılmasını həyata keçirirlər və gələcəkdə də keçirəcək. Ona görə, düşünürəm ki, gələcəkdə Gürcüstan azərbaycanlılarının vahid təşkilatının yaradılması istiqamətində bugünkü toplantı mühüm addım idi. Bu toplantıdan sonra biz də öz növbəmizdə fəallaşdıracağıq”.

Bununla da, Azərbaycanın müstəqilliyinin 20 illiyi münasibətilə avqustun 28-də Batumidə başlayan silsilə tədbirlər başa çatıb.