Diaspor

Ana səhifə

Diaspor

Amerikadakı Azərbaycan diaspor təşkilatları 11 sentyabr hadisələrinin ildönümü ilə bağlı bəyanat yayıblar

12 sentyabr 2011 08:42 (UTC +04:00)

Vaşinqton. İzabel Levin-APA. ABŞ-dakı Azərbaycan diasporu bütün amerikalılarla birlikdə 11 sentyabr terror aktları və bəşəriyyətə qarşı çevrilmiş digər cinayətlərin qurbanlarını yad edib və terrorizmlə mübarizədə qətiyyətini bir daha təsdiqləyib. Bu barədə APA-nın Vaşinqton müxbiri məlumat verir.

“On il əvvəl, bu gün, Birləşmiş Ştatlar və bütün dünya həyat tərzimizə qarşı çevrilmiş dəhşətli terror aktının şahidi oldu”. Amerikadakı Azərbaycan diaspor təşkilatlarının 11 sentyabr hadisələrinin 10 illiyi münasibətilə yaydığı birgə bəyanatda belə deyilir: “Nyu-Yorkda Dünya Ticarət Mərkəzinin qüllələrinə və Vaşinqtonda Pentaqonun binasına hücumlar 2 977 insanın həyatına son qoydu. Minlərlə amerikalı və digər millətlərin nümayəndələri həmin gün sevdikləri insanları itirdilər. Onların xatirəsi heç vaxt unudulmayacaq”.

11 sentyabr terror aktlarına reaksiya verərək, hava məkanından istifadə təklif edən və terrorla qlobal mübarizəyə qoşulan ilk ölkələr sırasında Azərbaycan da olub.

“Bu münasibət bir daha sübut etdi ki, Azərbaycan xalqı dünyanın hər yerində terrorun bütün formaları ilə mübarizə aparmağa hazırdır. Sonrakı illərdə yüzlərlə azərbaycanlı Əfqanıstanda və İraqda ABŞ qüvvələrinə dəstək olub. Amerika dəniz piyadaları korpusunda xidmət edən San Dieqodan olan azərbaycanlı kiçik kapral Murad Rəhimov İraqdakı hərbi əməliyyatlarda həlak olub”.

“Minlərlə günahsız insanın ölümünə bais olan 11 sentyabr terror aktlarına Azərbaycanın reaksiyası təsadüfi deyildi. Ermənistanın təcavüzü zamanı Azərbaycan özü də bir sıra terror aktlarına məruz qalıb. 1984-cü ildə Bakıda avtobusun partlaması nəticəsində iki uşaq anası həlak olub və bir neçə nəfər yaralanıb. 1992-ci ildə ermənilərin Xocalı şəhərinə hücumu zamanı 613 mülki şəxs, o cümlədən qadınlar və uşaqlar öldürülüb. 1994-cü ilin martında Bakı metropolitenində bomba partlayışı 14 nəfərin ölümünə və 42 nəfərin yaralanmasına səbəb olub. Bu siyahıda digər terror aktlarını da qeyd etmək olar”.