Diaspor

Ana səhifə

Diaspor

Böyük Britaniya Liberal Demokrat Partiyasının üzvü: “Əfqanıstanda koalisiya qüvvələrinin təchizatının 25 faizi Azərbaycan ərazisindən keçməklə daşınır”

21 sentyabr 2011 14:08 (UTC +04:00)

Bakı – APA. Avropa Azərbaycan Cəmiyyəti (AAC) liberal-demokratların “Bakıdan Birminqemədək” konfransında qəbul təşkil edib. AAC-dan APA-ya verilən məlumata görə, Azərbaycanın Birləşmiş Krallıqdakı səfiri Fəxrəddin Qurbanov, Azərbaycan üzrə parlament qrupunun Liberal Demokrat Partiyasından olan üzvləri Lord German və Stephen Gilbert tədbirdə çıxış ediblər. Konfransa AAC-ın hökumətlə əlaqələr üzrə nümayəndəsi Leon Cook sədrlik edib. Cook çıxışında Azərbaycan biznes mühitinin, investisiya imkanlarının və mədəniyyətinin Avropada tanıdılmasında AAC-ın rolunu qeyd edib. Stephen Gilbert liberal demokratların müdafiə strategiyasının müəyyənləşməsində özünün oynadığı roldan danışıb. Sonra o, Azərbaycan Silahlı Qüvvələrinin Əfqanıstanda Beynəlxalq Təhlükəsizliyə Yardım Qüvvələrində (İSAF) iştirakına toxunub. O bildirib ki, Əfqanıstanda koalisiya qüvvələrinin təchizatının 25 faizi Azərbaycan ərazisindən keçməklə daşınır.

Lord German bildirib ki, AAC-ın dərc etdiyi materiallar 2012-ci ildə “Eurovision” mahnı müsabiqəsinə ev sahibliyi edəcək Azərbaycan haqqında dəyərli məlumatlar verir. Lord daha sonra Azərbaycan neftinin və qazının Avropanın gələcək enerji təhlükəsizliyində əhəmiyyətini vurğulayıb. O bildirib ki, Birləşmiş Krallıq Azərbaycanda ən böyük investor, Azərbaycan isə dünyada ən sürətli iqtisadi artıma malik ölkələrdən biridir.

Lord German ümidvar olduğunu bildirib ki, Azərbaycan daha çox Qərb təmayüllü ölkə olacaq. O, Azərbaycanın pərakəndə satış sektorunda “Mothercare”, “Accessorize and Debenhams” kimi firmaların rolunun artdığını qeyd edib.

Səfir F. Qurbanov bildirib ki, Azərbaycan bu il müstəqilliyinin 20 illiyini qeyd edir. O, Birləşmiş Krallığın Azərbaycanın müstəqilliyini tanıyan ilk ölkələr sırasında olduğunu bildirib. Diplomat ölkələr arasında sıx iqtisadi əlaqələrin olduğunu deyib, Azərbaycan prezidenti İlham Əliyevin 2009-cu ildə Birləşmiş Krallığa rəsmi səfərini xatırladıb.

Səfir bildirib ki, neft və qaz hasilatı və ötürülməsi Azərbaycan üçün prioritet məsələdir, Azərbaycanla Birləşmiş Krallıq arasında əlaqələrin əsasını təşkil edir. O, Azərbaycanın bank, turizm, kənd təsərrüfatı və digər iqtisadi sahələrinin əməkdaşlığa hazır olduğunu da bildirib. Səfir qeyd edib ki, Azərbaycan NATO Sülh Tərəfdaşlığı Qrupunda mühüm rol oynayır və anti-terror koalisiyasında fəal iştirak edir.

F. Qurbanov bəyan edib ki, Azərbaycan “Eurovision-2012” mahnı müsabiqəsinin uğurla keçəcəyinə təminat verir. Ölkənin birinci xanımı Mehriban Əliyeva “Eurovision” Təşkilat Komitəsinə rəhbərlik edir. Səfir Azərbaycanın “Eurovision” yarışması zamanı 150 000 qonaq qəbul etməyə hazırlaşdığını deyib: “Ölkəmiz viza məsələsinin və Britaniya vətəndaşlarının ölkəyə gəlişinin asanlaşdırılması üçün əlindən gələni edəcək”.

AAC