Diaspor

Ana səhifə

Diaspor

Akademik Heydər İmanov: “Yaratdığımız təşkilatın əsas məqsədi Sankt-Peterburqdakı bütün azərbaycanlıları birləşdirməkdir”

26 sentyabr 2011 07:03 (UTC +04:00)

Bu açıqlamanı APA-nın Rusiya müxbirinə Sankt-Peterburqda yeni təsis olunan “Sankt-Peterburq Azərbaycanlıları Cəmiyyəti” diaspora təşkilatının sədri, Smolnı Universitetinin rektoru, akademik Heydər İmanov verib.

O Dünya Azərbaycanlılarının III Qurultayında prezident İlham Əliyevin söylədiyi sözləri xatırladıb: “Prezidentimiz diaspora təşkilatlarında mövcud olan münaqişələrin onu nə qədər incitdiyini söylədi. Bütün dünyada mövcud olan Azərbaycan diasporları bu sözləri eşitməlidir. Bizim yaratdığımız təşkilatın əsas məqsədi Sankt-Peterburqdakı bütün azərbaycanlıları birləşdirməkdir. “Sankt-Peterburq Azərbaycanlıları Cəmiyyəti” Azərbaycanın Rusiyada həm siyasi, həm iqtisadi, həm də informasiya resursu olmalıdır. Biz bütün imkanlarımızdan istifadə edib Azərbaycana dayaq olmalıyıq. Təşkilatın məqsədi, Rusiya və Azərbaycan xalqları arasında dostluq münasibətlərini daha da möhkəmləndirmək, hər iki ölkə arasında mövcud olan mədəniyyət, iqtisadiyyat və digər sahələrdə əlaqələrin inkişafına daha çox kömək etməkdən ibarətdir”.

Heydər İmanov həyata keçirəcəkləri ilk layihənin Sankt-Peterburq şəhərində peşəkar jurnalistlərdən ibarət bir qurum yaratmaq olduğunu deyib: “Bunun sayəsində Azərbaycan həqiqətlərini, Dağlıq Qarabağ problemi ilə bağlı məsələləri Rusiya xalqına çatdıracağıq. Daha sonra Sankt-Peterburq şəhərində Azərbaycan dilində məktəb açmaq, Smolni Universitetində Azərbaycan dili fakültəsini yaratmaq və bir sıra digər layihələrimizi gerçəkləşdirəcəyik”.

Qeyd edək ki, Heydər İmanov 1944-cü ildə Qubadlı rayonunda anadan olub. 1953-cü ildə Bakıya köçüb. 1963-cü ildə Bakı Texnoloji Texnikumunu bitirəndən sonra təhsilini davam etdirmək üçün Sankt-Peterburqa gedib. 1986-cı ildən 1992-ci ilə qədər Azərbaycanda yaşayıb. Bu dövrlər ərzində Gəncə Çini Qablar Zavodunda baş direktoru vəzifəsində çalışıb. 10 il müdafiə sənayesi sahəsində işləyib. Texnika elmləri doktorudur. 2004-cü ildən Sankt-Peterburq Smolnı Universitetində fəaliyyətə başlayan akademik Heydər İmanov hal-hazırda həmin universitetin rektorudur.