Diaspor

Ana səhifə

Diaspor

Avropa Azərbaycan Cəmiyyəti İmişlidə yaşayan fransız qadının Fransaya səfərini təşkil edib

07 oktyabr 2011 15:10 (UTC +04:00)

Cəmiyyətdən APA-ya verilən məlumata görə, səfər çərçivəsində xanım Botto-Şirməmmədova Avropa Azərbaycan Cəmiyyətinin araşdırmaları nəticəsində, Fransada yaşadığı aşkar olunan qohumları ilə görüşəcək, doğulub boya başa çatdığı qəsəbəyə gedəcək və vəfat etmiş doğmalarının məzarlarını ziyarət edəcək.

Avropa Azərbaycan Cəmiyyəti Fransanın müvafiq arxivlərindən, o cümlədən Fransanın Azadlıq Hərəkatı muzeyindən xanım Botto-Şirməmmədovaya aid sənədlər və fotolar, eləcə də, onun doğum haqqında şəhadətnaməsini tapmağa müvəffəq olub.

Bu səfərin təşkili ilə yanaşı, Avropa Azərbaycan Cəmiyyəti xanım Botto-Şirməmmədovanın həyatından bəhs edən sənədli filmin çəkilişi üzərində də işləyir. Filmin çəkilişləri həm Azərbaycanda, xanım Botto-Şirməmmədovanın yaşadığı İmişlinin Murğuzəlli kəndində, həm də onun doğulduğu Lion şəhərinin ətrafında yerləşən Lefoye qəsəbəsinə aparılır. Filmin təqdimatı cari ilin noyabr ayında Parisdə keçiriləcək və daha sonra Fransa televiziyalarında nümayiş etdiriləcək.

Avropa Azərbaycan Cəmiyyəti səfərin təşkilində və filmin çəkilişində göstərdiyi təşkilatı dəstəyə görə Fransanın Azərbaycandakı səfirliyinə, eləcə də, Paris şəhərinin meriyasına və Şarl de Qol hava limanının rəhbərliyinə öz təşəkkürünü bildirib.

Qeyd edək ki, Avropa Azərbaycan Cəmiyyəti (TEAS) Avropada Azərbaycanın beynəlxalq nüfuzunun artırılması və Azərbaycan həqiqətlərini dünya ictimaiyyətinə çatdırılmasına dəstək vermək məqsədilə Böyük Britaniyada təsis edilib və mərkəzi ofisi Londonda yerləşən müstəqil qeyri-hökumət təşkilatıdır.

Xatırladaq ki, səksən üç yaşlı İvonna Botto Jak Azərbaycana 1947-ci ildə gəlin olaraq gəlib. Onun həyat yoldaşı, Sovet ordusunda döyüşən sıravi Şəmməd Şirməmmədov 1944-cü ildə faşistlərə əsir düşüb və İtaliyadakı əsir düşərgəsinə aparılıb. ABŞ ordusu İtaliyanı azad edəndə o, Fransaya qaçmağa müvəffəq olub. O, Fransa Azadlıq Hərəkatına qoşulur və Paul Botto Jak ilə tanış olub. Sonradan Ş. Şirməmmədov Paulun bacısı İvonna ilə tanış olub və müharibədən iki il sonra onunla ailə həyatı quraraq Azərbaycana gəlib. İvonna 64 ildir ki, Azərbaycanda yaşayır.