Diaspor

Ana səhifə

Diaspor

İsveç parlamentində Dağlıq Qarabağ münaqişəsinə dair qətnamə müzakirə ediləcək

10 oktyabr 2011 07:17 (UTC +04:00)

İsveç-Azərbaycan Akademik Cəmiyyətinin sədri Nərgiz Nədainin APA-ya verilən məlumata görə, bu, İsveç Azərbaycan diasporunun üzvləri tərəfindən hazırlanan ikinci qətnamə layihəsidir. İlk parlament qətnaməsi layihəsi Cənubi Azərbaycanda insan haqlarının vəziyyətinə həsr olunub (http://riksdagen.se/webbnav/index.aspx?nid=410&dok_id=GU02U256), ikinci qətnamə layihəsində isə Ermənistan Silahlı Qüvvələrinin işğal olunmuş Azərbaycan torpaqlarından çəkilməsi tələb edilir və azərbaycanlı köçkünlərin öz evlərinə qayıtmaq hüquq təsbit olunur (http://riksdagen.se/webbnav/index.aspx?nid=410&dok_id=GZ02XMP2301.

Qətnamə təşəbbüsü hal-hazırda Yaşıllar Partiyasının parlamentdəki fraksiyasının rəhbəri, tanınmış və nüfuzlu millət vəkili Mehmet Kaplan tərəfindən qeydiyyatdan keçirilib. Yaşıllar Partiyası ölkənin üçüncü ən böyük siyasi qüvvəsi hesab edilir və proqnozlara görə növbəti illərdə onun nüfuzu daha da artacaq.

Oktyabrın 5-də qeydiyyatdan keçirilmiş qətnamə layihəsində münaqişənin tarixçəsi təsvir edilir və müharibənin Ermənistan ilə Dağlıq Qarabağda yaşayan ermənilərin separatçı niyyətləri səbəbindən baş verdiyi, nəticədə 1 milyon azərbaycanlı köçkünün öz yurdundan qovulduğu bildirilir. Bundan başqa sənəddə Ermənistan və qondarma Dağlıq Qarabağ Respublikasının beynəlxalq hüquq normalarının kobud pozuntularına yol verməsinə dair bir sıra məlumatlar öz əksini tapıb. Bu kimi cinayətlər sırasına zor gücünə insanların qovulması, evlərin qarət olunması və yandırılması, insanların oğurlanması və girov saxlanılması, hərbi əsirlərin döyülməsi və edam olunması, hərbi hava qüvvələrindən dinc əhali nəzərə alınmadan istifadə olunması aid edilib. Sənəddə Xocalı soyqırımı qənaətbəxş şəkildə sənədləşdirilmiş bu kimi müharibə cinayətlərinə nümunə olaraq göstərilir.

Bundan başqa, qətnamədə BMT, AB və AŞPA qətnamələrində beynəlxalq ictimaiyyətin Azərbaycanın ərazi bütövlüyünü təsdiq etməsi, bütün erməni silahlı qüvvələrinin işğal olunmuş ərazilərdən dərhal və qeyd-şərtsiz çəkilməsini tələb olunur.

Parlament layihəni səsverməyə çıxarmazdan öncə Xarici İşlər Komitəsi onu müzakirə edəcək. Xarici İşlər Komitəsinin parlamentə verəcəyi tövsiyələrlə bağlı yekdillik əldə olunmayacağı təqdirdə, qanunverici orqanda səsvermədən əvvəl müzakirələr aparılacaq. Parlamentin qərarları məcburi xarakter daşıdığından səsvermənin müsbət şəkildə nəticələnməsi İsveç hökumətinin üzərinə onun tələblərini icra etmək və onu xarici siyasətinin fəal tərkib hissəsi etmək vəzifəsini qoyur.