Diaspor

Diaspor

“EkoAvrasya” jurnalının Azərbaycana həsr olunmuş xüsusi buraxılışı nəşr edilib

13 oktyabr 2011 15:29 (UTC +04:00)

Bakı-APA. Türkiyənin “EkoAvrasya” jurnalının Azərbaycana həsr olunmuş xüsusi buraxılışı nəşr olunub. Diasporla İş üzrə Dövlət Komitəsinin mətbuat xidmətindən APA-ya verilən məlumata görə, jurnalın üz qabığında bu sayın xüsusi olaraq Azərbaycana həsr olunduğu barədə qeyd, Azərbaycan prezidenti İlham Əliyevin iyulun 5-də Dünya Azərbaycanlılarının III Qurultayında nitq söyləyərkən çəkilən fotoşəkli verilib.
Jurnalda Azərbaycanın iqtisadiyyatı, neft sənayesi, xarici siyasəti, Azərbaycanın Qafqazdakı geosiyasi rolu, Azərbaycan və Türkiyə, Azərbaycan-Avropa Birliyi münasibətlərinə dair məqalələr dərc olunub.
Jurnalda Azərbaycanla Türkiyə münasibətlərinə xüsusi toxunulub və bu münasibətlərin iki ölkə arasında imzalanmış Strateji Tərəfdaşlıq Sazişi ilə daha yüksək səviyyəyə çatdığı qeyd olunub. Türkiyənin Baş naziri Rəcəb Tayyib Ərdoğanın Azərbaycana son səfərinə həsr olunmuş məqalədə Türkiyənin bundan sonra da Ermənistan-Azərbaycan münaqişəsinin nizamlanması məsələsində Azərbaycanın yanında olacağı, terrora qarşı birgə aparılan mübarizənin davam etdiriləcəyi fikri əks olunub.
Jurnalda Heydər Əliyev Fondunun vitse-prezidenti Leyla Əliyevanın Böyük Britaniyanın “Haffinqton post” qəzetində dərc olunmuş “Yaşıl gündəlik: Sərhədləri aşaraq” başlıqlı məqaləsinə dair də material dərc edilib.
Nəşrdə Azərbaycanın “Eurovision” beynəlxalq mahnı müsabiqəsində qələbəsinə həsr olunmuş məqalə də yer alıb. “EkoAvrasya” jurnalında Azərbaycan Respublikası Diasporla İş üzrə Dövlət Komitəsinin sədri Nazim İbrahimovun bəyan etdiyi “Dünyadakı bütün diaspor təşkilatlarımız azərbaycanlıların rifahı üçün çalışmaqdadır” ifadəsi başlığa çıxarılan məqalə də yer alıb. N. İbrahimov diaspor quruculuğu prosesinə Heydər Əliyev Fondunun töhfəsinin əvəzsiz olduğunu qeyd edib və “Xocalıya ədalət!” kampaniyasının Azərbaycan diasporunun ən böyük uğurlarından biri olduğunu vurğulayıb.

Xatırladaq ki, “EkoAvrasya” jurnalının təsisçisi Avrasiya İqtisadi Sosial Əlaqələr Dərnəyidir. Rübdə 1 dəfə nəşr olunan jurnal dünyanın 10-dan artıq ölkəsində pulsuz yayımlanır.

“EkoAvrasya” jurnalı