Din

Ana səhifə

Din

Azərbaycanın şimal-qərb bölgəsində 276 məscid fəaliyyət göstərir

02 oktyabr 2012 09:10 (UTC +04:00)

Bakı. Ramil Məmmədli - APA. Azərbaycanın şimal-qərb bölgəsinə daxil olan 7 rayonda 276 məscid mövcuddur. Bu məscidlərin icmalarından yalnız 111-i dini icma kimi dövlət qeydiyyatdan keçib. Lakin dövlət qeydiyyatına alınan 111 icmanın hamısı aktiv fəaliyyət göstərmir. Təəssüf ki, aktiv fəaliyyət göstərən icmaların sayı 40-a çatmır.

APA-nın məlumatına görə, bunu Oğuz şəhərində Dini Qurumlarla İş üzrə Dövlət Komitəsi (DQİDK) ilə İslam Konfransı Gənclər Forumu Avrasiya Regional Mərkəzinin təşkilatçılığı ilə “Dövlət-din münasibətləri və maarifləndirmə işi” mövzusunda seminar-treninqdə çıxışı zamanı dövlət komitəsinin sədr müavini Gündüz İsmayılov deyib.

G.İsmayılov bildirib ki, şimal-qərb bölgəsinin dini icmaları daha aktiv və əməkdaşlığa meylli icmalar olsa da, digər bölgələrdə rast gəlinən problemlər burada olmasa da, bu regiondakı dini mühit də problemlərdən xali deyil.

G.İsmayılov dövlət qeydiyyatına alınan icmaların sayının az olma səbəbləri haqda da danışıb: “Bunun biri dini icmalarda dini təhsilli rəhbərlərin sayının arzu edilən səviyyədə olmamasıdır. Müqayisə üçün deyək ki, bölgədə dövlət qeydiyyatına alınan 111 icmadan 48-nin sədrinin nə dini, nə də dünyəvi təhsili var. Əlbəttə, digər bölgələrlə müqayisədə bu regionda vəziyyət bir qədər yaxşıdır”.

Komitə sədrinin müavini bildirib ki, bölgələrdəki mədrəsələrin məzunlarının bir çoxu yerli icmalarda təmsil olunmur: “Əlbəttə, qanunvericiliyin tələbi baxımdan icmanın üzvü olmaq üçün dindar olması kifayətdir. Bizim tərəfimizdən belə bir tələb də olmayıb. Amma burada intellektuallıq əsas amillərdəndir. İcmalarda ali dini təhsili şəxslərin azlığı bir çox hallarda dini icmanın zəifliyinə gətirib çıxarır. İcmanın sədri təcrübəli olmadığı halda icmalarda alternativ qruplar yaranmağa başlayır. Sonradan daxili konfliktlərin yaranması ilə də nəticələnir. Ona görə də təhsilli dindarların icmalara cəlb olunmasının tərəfdarıyam”. O, icmalarda sədr və axundlar arasında münasibətlərdə gərginlik hallarının olması faktlarının mövcudluğunu da vurğulayıb: “İcma sədri ilə axundun və ya imamın yola getməməsi nəticədə insanların etimadsızlığı ilə qarşılaşır. İcma üzvləri isə icmanın maliyyə məsələlərinin rəhbər tərəfindən idarə olunmasını narazılıqla qarşılayır və ya bu iddia ilə çıxış edirlər”.

G.İsmayılov dini icmaların kəndlərdə xeyir və şər məsələlərində yaxından iştirak etməyə də çağırıb: “Bununla da qeyri-ənənəvi dini icmalar artıq müdaxilə edə bilmir. Çünki əhalinin inamını qazanır. İcmaların idarəçiliyində şəffaflığın təmin olunması da qurumun fəaliyyətini gücləndirir. Hətta əlavə dəstəkləri də meydana çıxır. Əksər icmalarda xərclərdə şəffaflıq təmin edilmir. Biz icmaların aktivliyinin tərəfdarıyıq. Problemlərin həlli bir-birinə zəncirvari bağlıdır”.

G.İsmayılov dini icmaların ədəbiyyatla təminatı məsələsində də komitənin zəruri işlər gördüyünü də qeyd edib.