Din

Ana səhifə

Din

Dini Qurumlarla İş üzrə Komitənin sədri: “Avropa tolerantlıq baxımından Azərbaycandan çox şey öyrənə bilər”

05 oktyabr 2012 08:52 (UTC +04:00)

APA-nın məlumatına görə, dəyirmi masanın moderatorları Avropa Parlamentinin üzvü, Parisin 7-ci ərazisinin meri Rəşidə Dati, Malayziya Xarici İşlər Nazirliyinin Diplomatiya və Xarici Əlaqələr İnstitutunun baş direktoru Dato Ku Caffar Ku Şaari və Bakı Slavyan Universitetinin rektoru Kamal Abdulladır.

Dəyirmi masada çıxış edən Malayziya Xarici İşlər Nazirliyinin Diplomatiya və Xarici Əlaqələr İnstitutunun baş direktoru Dato Ku Caffar Ku Şaari ölkəsinin tolerantlıq məsələsinə xüsusi həssaslıqla yanaşdığını deyib. O bildirib ki, Asiya regionun mədəni irsinin dünyada təbliğ edilməsi istiqamətində səylər göstərirlər.

“Dinlərarası dialoq problemi: dəyərlər və hüdudlar” adlı I bölmədə İSESKO-nun baş direktoru Abdulaziz Osman əl-Tuveyeri, Bolqarsıtanın sabiq prezidenti Georgi Pırvanov və Cənubi Koreyanın Hankuk Xarici Araşdırmalar Universitetinin prezidenti Park Çul çıxış ediblər.

Cənubi Koreyanın Hankuk Xarici araşdırmalar UniversitetininTürkiyə-Azərbaycan üzrə Tədqiqatlar şöbəsinin professoru Çonq Jin Oh ölkələrində 100 min müsəlman yaşadığını nəzərə çatdırıb. Onun sözlərinə görə, Cənubi Koreya hökumətinin siyasəti müsəlmanların maraqlarına cavab vermir: “Buna səbəb Koreyada müsəlmanlarla bağlı yetərincə məlumatların olmamasıdır. Qeyri-hökumət təşkilatları bu sahədə aktiv olmalıdır”.

Dini Qurumlarla İş üzrə Komitəsinin sədri Elşad İsgəndərov tədbirin keçirildiyi İçərişəhərdə islam, xristian dinlərinə məxsus dini məbədlərin olduğunu diqqətə çatdırıb. O, Bakının rəmzi sayılan Qız qalasının isə zərdüştlüklə bağlı abidə olduğunu, Bakıda sinaqoqun fəaliyyət göstərdiyini vurğulayıb: “Biz hər şeyi sıfırdan başlamalıyıq. Bir-birimizdən soruşmalıyıq ki, aramızdakı fərqləri necə aradan qaldıra bilərik. Bu baxımdan dini tolerantlıq bu tədqiqat üçün başlanğıc olmalıdır. Bununla belə, məsələyə səhlənkar yanaşma fərqləri dərinləşdirə bilər. Əgər insanlar özlərini dialoqa getməyə hazır sayırlarsa, dialoq başlayır. Fərdlər arasında dialoqa qoşulma mexanizmi olmasa, ünsiyyətimiz baş tuta bilməz”.

Azərbaycanın dini tolerantlıq baxımından unikal ölkə olduğunu vurğulayan Elşad İsgəndərov deyib ki, bu baxımdan Avropa da Azərbaycandan çox şey öyrənə bilər: “Azərbaycanda zərdüştlük, xristian dinləri olub. Xristianlıq Qafqaz Albaniyasında ilk din olub. Azərbaycanda yəhudi icmalarının da yaşadığını qeyd etmək lazımdır”. Dövlət Komitəsinin sədri bildirib ki, Azərbaycanın şimal rayonlarında iki sinaqoq bərpa edilib: “Bu sinaqoqlara gələn insanların sayı da çoxalır. Bu, dərin qarşılıqlı anlaşmadan xəbər verir. Sinaqoqların bərpa edilməsi yaxşı haldır. Bu kimi addımlarla biz mürəkkəb dünyada dini tolerantlığı genişləndirə bilərik” .