Moskva. Fərid Əkbərov - APA. Sentyabrın 22-də Rusiya Dövlət Dumasında “Müasir şərtlərdə Rusiya ilə Azərbaycan arasında qarşılıqlı fəaliyyətin iqtisadi və maliyyə aspektləri” mövzusunda dəyirmi masa keçiriləcək.
APA-nın Moskva müxbirinin verdiyi məlumata görə, tədbirin təşkilatçısı Rusiya-Azərbaycan Dostluq Mərkəzidir. Dəyirmi masanın sədri qismində Dövlət Dumasının Maliyyə bazarları ilə iş üzrə komitəsinin sədr müavini, Rusiya-Azərbaycan parlamentlərarası dostluq qrupunun rəhbəri Dmitri Savelyev çıxış edəcək.
Tədbirdə Dövlət Dumasının deputatları, Federasiya Şurasının üzvləri, Azərbaycandan olan nümayəndələr, ekspertlər, eləcə də kütləvi informasiya vasitələrinin nümayəndələri Rusiya-Azərbaycanın qarşılıqlı əməkdaşlığının aktual məsələlərinə dair müzakirə aparacaqlar.
Əsas müzakirə mövzusu ikitərəfli iqtisadi münasibətlərin problemləri və perspektivləri, o cümlədən regional səviyyədə müxtəlif planlı əməkdaşlıq, ikitərəfli layihələrə informasiya dəstəyinin verilməsi və bu prosesə KİV-lərin cəlb olunması olacaq.
Tədbirin keçirilməsində əsas məqsəd Rusiya-Azərbaycan çoxtərəfli əməkdaşlığının inkişafı üçün səylərin birləşdirilməsidir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
