Bu gün Bakı Dövlət Universitetinin rektoru, akademik Abel Məhərrəmov İraqın ölkəmizdəki səfiri Heydər Şiyə Qubeyşi əl-Barrakı qəbul edib.
BDU-nun Mətbuat və İnformasiya şöbəsindən APA-ya verilən məlumata görə, səfirə universitet haqqında məlumat verən akademik Abel Məhərrəmov onun tarixi, inkişaf mərhələləri, beynəlxalq əlaqələri və Azərbaycan-İraq münasibətlərindən danışıb.
Öz növbəsində qəbul üçün rektora təşəkkür edən səfir Heydər Şiyə Qubeyşi əl-Barrak ölkələrarası münasibətlərdən məmnunluq ifadə edib. Səfir hələ Sovet dövründən - 1974-cü ildən İraqın Azərbaycanda nümayəndəsinin fəaliyyət göstərdiyini bildirib və diplomatik münasibətlərin 40 illik yubileyinə hazırlaşdıqlarını bəyan edib.
Azərbaycanda 300-dən çox iraqlı tələbənin təhsil aldığını deyən səfir yaxın gələcəkdə onların sayının 1000 nəfərə çatdırılacağını diqqətə çatdırıb. Bu baxımdan universitetlərarası əməkdaşlığın genişləndirilməsində, ərəb dilinin daha da inkişafı baxımından tələbə, müəllim mübadiləsində maraqlı olduqlarını bildirib. Səfirin sözlərindən məlum olub ki, iraqlılar, xüsusən Kərkükdən olan türkmən tələbələr Azərbaycanda təhsil almaq istəyirlər.
Rektor Abel Məhərrəmov səfirin təkliflərini yüksək qiymətləndirib. Eyni zamanda diplomatik münasibətlərin 40 illiyi münasibətilə beynəlxalq konfrans və simpoziumların keçirilməsi barədə fikir mübadiləsi aparılıb.
Sonra İraq Mədəniyyəti günü ilə əlaqədar bu ölkənin mədəniyyət nümunələri təqdim olunub, rəqslər nümayiş etdirilib.
Səfir sonda BDU ilə yaxından tanış olub, elmi-tədqiqat laboratoriyalarına və mərkəzlərə baxıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
