Hadisə

Ana səhifə

Hadisə

Zaqatalada yol qəzasında bir nəfər ölüb, üç nəfər yaralanıb

06 iyul 2026 08:07 (UTC +04:00)

Zaqatalada iki minik avtomobilinin toqquşması ilə nəticələnən ağır yol-nəqliyyat hadisəsi baş verib.

APA-nın Şimal-qərb bürosunun məlumatına görə, qəza gecə saat 02 radələrində Zaqatala şəhərinin girişində qeydə alınıb.

Belə ki, Zaqatala şəhər sakini, 41 yaşlı Orxan Ədalət oğlu Orucovun idarə etdiyi "Tofaş" markalı minik avtomobili ilə rayonun Faldarlı kənd sakini Əhməd Teymur oğlu Camalovun idarə etdiyi "BMW" markalı minik avtomobili toqquşub.

Hadisə nəticəsində sürücülər Orxan Orucov və Əhməd Camalov, həmçinin Kəpənəkçi kənd sakinləri – 41 yaşlı Cavid Emin oğlu İsayev və 38 yaşlı Saniyə Hüseyn qızı İsayeva müxtəlif dərəcəli bədən xəsarətləri alaraq Zaqatala Rayon Mərkəzi Xəstəxanasının Cərrahiyyə korpusunun Təcili Tibbi Yardım şöbəsinə yerləşdiriliblər.

Yaralılardan "Tofaş" markalı avtomobilin sürücüsü Orxan Orucov aldığı ağır xəsarətlərdən xəstəxanada vəfat edib.

Digər yaralıların müalicəsi davam etdirilir.

Daxili İşlər Nazirliyinin Mətbuat Xidmətinin regional qrupundan bildirilib ki, faktla bağlı cinayət işi başlanılıb, araşdırma aparılır.

TƏBİB-dən APA-ya verilən xəbərə görə, Zaqatala rayonu ərazisində baş vermiş yol-nəqliyyat hadisəsi nəticəsində xəsarət alan 4 nəfər (3-ü kişi, 1-i qadın) iyulun 6-da saat 01:20 radələrində Zaqatala Rayon Mərkəzi Xəstəxanasının II Təcili tibbi yardım şöbəsinə hospitalizasiya olunub.

Bədənin müxtəlif nahiyələrinin açıq yarası, əziyi diaqnozları təyin olunan şəxslərin hər birinə zəruri tibbi xidmətlər göstərilib. Vəziyyətləri qənaətbəxş qiymətləndirilən 2 nəfərin müalicəsi Təcili tibbi yardım şöbəsində, vəziyyəti orta ağır qiymətləndirilən 1 nəfərin müalicəsi isə Cərrahiyyə şöbəsində davam etdirilir.

Vəziyyəti ağır qiymətləndirilən 1985-ci il təvəllüdlü şəxsə (kişi) isə zəruri reanimasiya tədbirlərinin göstərilməsinə baxmayaraq, saat 01:32-də bioloji ölüm faktı qeydə alınıb.