Maliyyə

Ana səhifə

Maliyyə

Azərbaycan Mərkəzi Bankında bank sektoru və biznes icmasının nümayəndələrinin iştirakı ilə geniş müşavirə keçirilib

11 fevral 2011 12:18 (UTC +04:00)

AMB-dən «APA-Economics»ə verilən məlumata görə, tədbirdə Azərbaycan İpoteka Fondu və Maliyyə Monitorinq Xidməti, habelə Əmanətlərin Sığortalanması Fondunun rəhbərliyi də iştirak edib.

Müşavirəni giriş sözü ilə açan E.Rüstəmov qeyd edib ki, əhali və sahibkarların bank xidmətləri barədə məlumatlandırma səviyyəsi artırılmalı, onlara ətraflı və təfərrüatlı izahatlar verilməlidir. «Bank-müştəri münasibətlərində şəffaflıq prinsiplərinə ciddi əməl olunmalı və lüzumsuz bürokratiyaya yol verilməməlidir. Bank əməkdaşlarının etik davranış səviyyəsi artırılmalı, müştərilərlə rəftarda yüksək korporativ mədəniyyət nümayiş etdirilməlidir. Bank sektoru tərəfindən xidmətlər daha müasir texnologiyalar əsasında həyata keçirilməli, avtomatlaşdırma səviyyəsi artırılmalı, müştərilərlə fiziki təmas minimallaşmalıdır. Banklar öz məhsul və xidmətlərinin çeşidini genişləndirməli, geniş əhali kütləsi və müxtəlif iqtisadi fəaliyyət sektorlarının tələbatını ödəyən məhsullar təklif etməlidir», - deyə AMB sədri vurğulayıb.

Tədbirdə bankların regional şəbəkəsinin daha aktiv fəaliyyət göstərməsi və müvafiq maliyyə innovasiyaları müzakirə edilib. «Banklar nağdsız ödənişlər üzrə stimullaşdırıcı fəaliyyətə başlamalı, əqdlərin daha sərfəli qiymətlə aparılmasına çalışmalı, müştərilərə təklif edilən texnoloji infrastrutkuru daha da genişləndirməli və təkmilləşdirməlidirlər», - deyə E.Rüstəmov vurğulayıb.

AMB sədri vurğulayıb ki, aparılan təhlillərin nəticələrinə görə, ölkədə ipoteka kreditlərinə böyük tələbat var və bu mexanizm genişləndirilməlidir. Bunun üçün daxili bazarın maliyyə imkanlarından istifadə edilməlidir. Kreditlərin verilməsi zamanı vətəndaşların müraciətlərinə vaxtında baxılmalı, izafi bürokratiya aradan qaldırılmalıdır. Kreditlərin verilməsi prosesində vaxt və çəkilən xərclər minimallaşdırılmalıdır. Bunun üçün elektron ipoteka sisteminin yaradılması üzrə başlanan işlər tamamlanmalı, insan faktorunun rolu aşağı salınmalıdır.

«Biznes mühitin sağlamlaşdırılması istiqamətində Maliyyə Monitorinq Xidməti də mühüm rol oynayacaq. Xidmətin aidiyyatı orqanlarla birgə fəaliyyətinin effektivliyi artırılmalıdır. Banklar çirkli pul vəsaitlərinin bank sektoru vasitəsilə leqallaşdırılmasının qarşısının alınması üçün daxili sistemlərini və nəzarəti gücləndirməlidir», - deyə E.Rüstəmov bildirib.

Tədbirin sonunda Banklar Assosiasiyası və Sahibkarlar Konfederasiyası ilə birlikdə müzakirə edilən məsələlər üzrə müvafiq işçi qruplarının yaradılması qərara alınıb. Müzakirədə qaldırılan aktual məsələlər birgə şəkildə daha dərindən araşdırılacaq və tədbirlər planı hazırlanaraq reallaşdırılacaq.