Maliyyə

Ana səhifə

Maliyyə

Azərbaycan Mərkəzi Bankı bank sisteminə likvidlik dəstəyini artırıb

14 fevral 2011 12:16 (UTC +04:00)

Bakı. Vahab Rzayev – APA-Economics. Azərbaycan Mərkəzi Bankı (AMB) 2010-cu ilin oktyabr ayının sonunadək pul siyasəti alətlərində dəyişiklik etməsə də, noyabrda alətlərin parametrlərinin inflyasiya səviyyəsinə uyğun neytrallığını təmin etmək üçün uçot dərəcəsini 2%-dən 3%-ə qaldırılıb, bank sisteminin xarici öhdəliklərinə isə 0,5%-lik məcburi ehtiyat norması tətbiq edilib. «APA-Economics» xəbər verdiyi kimi, bu barədə Mərkəzi Bankın 2010-cu il üzrə hazırladığı Pul Siyasəti İcmalında deyilir.

İcmala əsasən, AMB tərəfindən pul siyasəti alətlərinin parametrlərinə dair qərar qəbul edilərkən 30-a yaxın tsikl göstəricisinin təhlili nəzərə alınıb ki, bura qabaqlayıcı, faza içi və gecikən tsikl göstəriciləri aiddir. İlin sonuna doğru Mərkəzi Bank tərəfindən daim təhlil olunan tsikl göstəriciləri arasında pul siyasətinin korreksiyası lehinə olan göstəricilərin sayı artmağa başlayıb ki, nəticədə pul siyasətinin bir qədər sərtləşdirilməsi barədə qərarlar qəbul olunub.

Lakin eyni zamanda, AMB tərəfindən bank sisteminə likvidlik dəstəyi davam etdirilib və onun həcmi il ərzində 35,7% artıb:

(mln. AZN)

	01.01.2010	01.01.2011
Likvidliyin verilməsi	1 483,5	2 012,9
Likvidliyin cəlb olunması	29,5	63,9
Likvidlik saldosu	1 454	1 949

Göründüyü kimi, AMB-nin likvidlik əməliyyatları üzrə saldo 2010-cu ilin əvvəlindəki 1 454 mln. manatdan ilin sonuna 1 949 mln. manata çatıb. Bu, pul kütləsinin iqtisadiyyatın tələbinə adekvat templə artmasını təmin etmək məqsədinə xidmət edib.

Qeyd edək ki, likvidlik saldosu AMB-nin likvidliyin verilməsi alətlərinin qalığı ilə likvidliyin cəlb olunması əməliyyatlarının qalığı arasındakı fərqi ifadə edir. Beləliklə, ötən il Mərkəzi Bank hələ də bank sisteminin dəstəklənməsində və bu alət vasitəsi ilə iqtisadiyyatı pulla təmin etməsində zərurət görüb.