Maliyyə

Ana səhifə

Maliyyə

«Günaybank» ötən il istehlak kreditləşməsini 3 dəfə artırıb

14 fevral 2011 12:49 (UTC +04:00)

Bakı. Hüseynquluyev - APA-Economics. Azərbaycanın «Günaybank» ASC-nin aktivlərinin həcmi 2011-ci il yanvar ayının 1-nə 33,028 mln. manat təşkil edib ki, bu da 2009-cu ilin yekun göstəricisi ilə müqayisədə 5,2% çoxdur.

Bankın baş ofisindən «APA-Economics»ə verilən məlumata görə, hesabat ilində bankın kredit portfeli 2,5% artaraq 27,990 mln. manat, o cümlədən istehlak kreditlərinin həcmi 3,1 dəfə artaraq 3,011 mln. manat, 12 ayadək verilmiş kreditlər 3,8 dəfə artaraq 29,780 min manat, 12 aydan artıq müddətə verilmiş kreditlər 2,5% artaraq 27,960 mln. manat, vaxtı keçmiş kreditlər 37,3% azalaraq 11,600 min manat olub.

Təhlil aparılan il ərzində bankın məcmu kapitalı 15% azalaraq 11,071 mln. manata, o cümlədən nizamnamə kapitalı 20% artaraq 13,024 mln. manata çatıb.

Qeyd edək ki, ötən il ərzində bankın ümumi gəlirləri 5,2% artaraq 5,614 mln. manat, o cümlədən faiz gəlirləri 5,9% artaraq 5,542 mln. manata, qeyri-faiz gəlirləri isə 31,2% azalaraq 72,03 min manata çatıb. Nəticədə, 2010-cu ildə bankın zərəri 1,522 mln. manat olub. Xatırladaq ki, 2009-cu ili bank 2,132 mln. manat mənfəətlə başa vurub.

Həmçinin, bankın cəmi müştərilərinin sayı 7,7% artaraq 2 579, aktiv plastik kartların sayı 1,8% azalaraq 111 olub. Eyni zamanda, il ərzində işçilərin sayı (39 nəfər) və orta aylıq əmək haqqı (300 manat) sabit qalıb.

Təsisçisi 10 yerli fiziki şəxs olan «Günaybank» ASC 1992-ci ildən fəaliyyət göstərir. Cari ilin yanvarın 1-nə bankın 1 filialı və 1 POS-terminalı olub.