Maliyyə

Ana səhifə

Maliyyə

Nadim İlahi: «Beynəlxalq Valyuta Fondu Azərbaycanda aparılan antikorrupsiya kampaniyasını dəstəkləyir»

15 fevral 2011 13:20 (UTC +04:00)

Bakı. Nicat Mustafayev – APA-Economics. Bu gün Bakıda Beynəlxalq Valyuta Fondunun (BVF) Azərbaycan üzrə missiyasının ölkəyə səfərinin yekunlarına dair mətbuat konfransı keçirilib.

«APA-Economics»in məlumatına görə, tədbirdə çıxış edən Azərbaycan üzrə missiyanın rəhbəri Nadim İlahi qeyd edib ki, səfər zamanı BVF-nin nümayəndələri ölkə hökuməti ilə bir sıra görüşlər keçirib, Azərbaycandakı son iqtisadi proseslər, həyata keçirilən makroiqtisadi siyasət və ortamüddətli iqtisadi perspektivlərin qiymətləndirilməsi müzakirə olunub: «Biz dövlət rəsmiləri, özəl sektor, vətəndaş cəmiyyəti və diplomatik korpusun nümayəndələri ilə görüşlər keçirmişik».

«Azərbaycan iqtisadiyyatının qlobal iqtisadi böhrandan sonra bərpası davam edir. Ötən il qeyri-neft sektorunda yüksək iqtisadi artım tempi müşahidə olunub və bu artım geniş dövlət investisiya xərcləri ilə əhəmiyyətli dərəcədə stimullaşdırılıb. Əsasən, qlobal ərzaq qiymətlərinin qalxması səbəbindən 2010-cu ildə inflyasiya yüksək templə artıb. İnflyasiya gözləntilərinin möhkəmlənməsi ilə bağlı artan əlamətlər müşahidə olunur», - deyə N.İlahi bildirib.

BVF rəsmisinin sözlərinə görə, Azərbaycanın 2011-ci il üçün perspektivləri də ümidvericidir, lakin 2011-ci ilin sonuna 10%-ə çatacağı gözlənilən inflyasiya makroiqtisadi risklər yaradır: «Rəsmi orqanların əsas vəzifəsi inflyasiya gözləntilərini məhdudlaşdırmaqdır, büdcə-vergi siyasəti isə tələblə bağlı təzyiqlərin zəiflədilməsinə yönəldilməlidir».

N.İlahi həmçinin bildirib ki, dünya bazarında ərzaq qiymətlərinin kəskin bahalaşması yüksək inflyasiyanın təsirinə ən çox məruz qalan yoxsul təbəqələr üçün əlavə ünvanlı sosial ayırmalar tələb edəcək: «Rəsmi orqanlar tərəfindən dövlət orqanlarında inhisarçılıq və korrupsiyanın qarşısının alınması üçün aparılan kampaniya BVF tərəfindən alqışlanır. İqtisadiyyatdakı pozuntuları aradan qaldırmaq və dövlət sektorunun effektivliyini artırmaq üçün bu istiqamətdə kompleks tədbirlər həyata keçirilməlidir».