Maliyyə

Ana səhifə

Maliyyə

Azərbaycan Beynəlxalq Bankı elektron bankçılıq sistemi üzrə xidmətlərini genişləndirir

16 fevral 2011 11:37 (UTC +04:00)

Bankın mətbuat xidmətindən «APA-Economics»ə verilən məlumata görə, ölkədə ilk dəfə olaraq bank müştəriyə hesabına nağd pulları daxil etməyə imkan verən «cash-in» tipli bankomatları quraşdırıb, bir sıra özünə xidmət məntəqəsi açıb və s. işlər görüb.

Qeyd edək ki, bu məntəqələr Fəvvarələr meydanında, «Park Bulvar» Alış-Veriş Mərkəzində, 28 May küç.,20 ünvanında yerləşdirilib. Bankın mətbuat xidmətinin rəhbəri Rauf Ağayevin sözlərinə görə, elektron bankçılıq üzrə xidmətlərin kəskin artımı ilə əlaqədar bank 2010-cu ildə həmçinin bankomatların menyularında təkmilləşdirmə işləri aparıb.

Bundan əlavə, 2010-cu ildə xidmətləri elektron bankçılıq vasitəsi ilə ödənilə biləcək partnyor-şirkətlərin siyahısı genişləndirilib və bura «Connect», «Azeurotel» və «Adanet» internet-provayderləri və «Azerfon-Vodafone» mobil rabitə operatoru daxil olunub. R.Ağayev bu istiqamətdə işlərin 2011-ci ildə də davam etdiriləcəyini vurğulayıb.

Qeyd edək ki, elektron bankçılığın ən populyar xidmətləri sırasında «Kart transfer», «Elektron depozit», «SMS xəbər alma» xidmətləridir.

Bankın mətbuat xidmətinin məlumatına görə, 2010-cu ildə elektron bankçılığın bütün kanalları vasitəsi ilə 567 min əməliyyat aparılıb, əməliyyatların həcmi 19,2 mln. manat təşkil edib ki, həmin göstəricilərin illik artım templəri müvafiq olaraq 13,7% və 41,2% təşkil edib. Ümumilikdə, 2007-2010-cu illər ərzində 46 mln. manat həcmində 1,7 mln. əməliyyat həyata keçirilib.

R.Ağayevin sözlərinə görə «Elektron depozit» xidməti çərçivəsində 1,2 mln. manat həcmində əmanətlər qəbul olunub ki, bu da əvvəlki ilə nisbətən 4,1 dəfə çoxdur.

Elektron bankçılıq sistemi vasitəsilə əməliyyatların sayının 90%-i bankomatlarla həyata keçirilən əməliyyatların payına düşsə də, həcm üzrə azalma tendensiyası müşahidə olunur. Belə ki, 2010-cu ildə həmin əməliyyatların həcminin 55%-i bankomatların payına düşüb ki, bu da əvvəlki ilə nisbətən 15 faiz bəndi azdır. Bundan başqa İnternet bankçılığın əməliyyatların həcmində payı 13%-dən 19%-dək, «MobilBanking»in payı 1%-dən 5%-dək, məlumat köşklərinin payı isə 16%-dən 21%-dək artıb.